नशिराबाद (सुनील महाजन) गेल्या दोन शतकांची अखंड परंपरा असलेल्या श्री खंडेराव महाराज यांच्या यात्रोत्सवास ६ एप्रिलपासून प्रारंभ होत आहे. चार दिवस चालणाऱ्या या उत्सवात बारागाड्या ओढणे, कठडे मिरवणूक, लोकनाट्य आदी कार्यक्रमाचे आयोजन करण्यात आले आहे. ७ एप्रिल रोजी सायंकाळी ६ वाजता बारागाड्या ओढण्याचा कार्यक्रम होईल.
सुनसगाव रस्त्यालगत श्री खंडेराव महाराज यांचे पुरातन मंदिर आहे. यात्रोत्सवानिमित्त दरवर्षी विविध कार्यक्रम घेण्यात येतात. यंदा ६ एप्रिल सोमवारी सकाळी ८ वाजता श्रींच्या मूर्तीस पंचामृत महाभिषेक पूजन करून यात्रोत्सवास प्रारंभ होईल. ६ रोजी सकाळी ८ वाजता पारंपरिक पूजन व दुपारी ४ वाजता सत्यनारायण पूजन होईल. चैत्र वद्य प्रतिपदेला अर्थात ७ रोजी पहाटे श्रींची पूजा सायंकाळी ६ वाजता भगत युवराज मोतीलाल धोबी यांच्या हस्ते बारागाड्या ओढण्याचा कार्यक्रम होईल.
सायंकाळी ४ वाजता कठडे मिरवणूक निघणार आहे. त्यानंतर रात्री ८ वाजता प्रियाबाई रावेरकर यांचा लोकनाट्याचा कार्यक्रम होईल. ८ व ९ रोजी सकाळी श्रींच्या मूर्तीस महापूजन अभिषेक व रात्री ८ वाजता लोकनाट्याचा कार्यक्रम होईल. कार्यक्रमाचा लाभ घ्यावा, असे आवाहन उत्सव समितीने केले आहे. कार्यक्रमास प्रमुख अतिथी म्हणून पालकमंत्री ना.गुलाबराव पाटील यांची उपस्थिती असणार आहे.
खंडेराव महाराज यात्रोत्सवाचे अध्यक्ष जिल्हा परिषद माजी उपाध्यक्ष लालचंद्र पाटील यांची निवड झाली. तर उपाध्यक्ष योगेश पाटील, खजिनदार ज्ञानदेव लोखंडे, सचिव मोहन येवले, सेक्रेटरी पंकज महाजन आहेत. मा.सरपंच विकास पाटील, प्रकाश बोंडे, किरण पाटील, किशोर पाटील आदींचे सहकार्य आहे. गावातील गणेश मंडळ, दुर्गोत्सव मंडळाचे कार्यकर्ते, ग्रामस्थ यात्रोत्सवासाठी परिश्रम घेत आहे. आतापर्यंत कै. रघू धोबी, कै. शंकर रघू धोबी, कै. गणपत शंकर धोबी, कै दामू शंकर धोबी कै. मोतीलाल संपत धोबी व सुदाम धोबी यांनी बारागाड्या ओढलेल्या आहेत. दोनशे वर्षांपासून धोबी घराण्याकडे बारागाड्या ओढण्याचा मान आहे.
