मुंबई (वृत्तसंस्था) दिवंगत अभिनेता सुशांतसिंह राजपूत मृत्यू प्रकरणातनंतर नारकोटिक्स कंट्रोल ब्युरो (एनसीबी) ड्रग्स प्रकरणात तपासाची व्याप्ती वाढत आहे. यामध्ये आता राष्ट्रवादीचे नेते नवाब मलिक यांचे जावई समीर खान यांना एनसीबीने समन्स पाठवलं असून त्यांची चौकशी सुरु आहे.
आंतरराष्ट्रीय ड्रग्ज तस्कर करण सजनानीच्या चौकशीदरम्यान समीर खान यांचं नाव समोर आल्याची माहिती सूत्रांनी दिली आहे. त्यानंतर एनसीबीने समीर खान यांना समन्स पाठवलं. त्यानुसार समीर खान आज सकाळी एनसीबी कार्यालयात हजर राहिले असून त्यांची चौकशी सुरु आहे. एनसीबी सूत्रांच्या माहितीनुसार, गेल्या आठवड्यात शनिवारी एनसीबीने करण सजनानी नावाच्या आंतरराष्ट्रीय ड्रग तस्कराला अटक केली होती. त्याच्याकडून २०० किलो गांजाही जप्त करण्यात आला होता. त्याचप्रकरणी चौकशीदरम्यान बऱ्याच लोकांचं नाव समोर आलं होतं. त्यात समीर खान यांचंही नाव असल्याचं उघड झालं. त्यामुळे मंगळवारी (१२ जानेवारी) रात्री आठच्या सुमारास एनसीबीच्या एक टीमने वांद्र्यात जाऊन समीर खान यांना समन देऊन चौकशीसाठी हजर राहण्यास सांगितलं होतं. त्यानुसार समीर खान आज (१३ जानेवारी) सकाळी साडेआठ वाजता चौकशीसाठी एनसीबीच्या कार्यालयात हजर झाले. सध्या त्यांची चौकशी सुरु आहे.
एनसीबीने म्हंटले कि, समीर खान आणि करन सजदानी यांच्यामधील २ हजार रुपयांचा व्यवहार ड्रग्जप्रकरणी झाला असल्याचा आम्हाला संशय आहे. याची पडताळणी करण्यासाठी समीर खान यांना चौकशीसाठी बोलविण्यात आले आहे. दरम्यान, यापूर्वीही बॉलिवूड ड्रग्ज कनेक्शन प्रकरणी एनसीबीकडून अनेक सेलिब्रिटींची चौकशी करण्यात आली आहे. यात दीपिका पदुकोण, रकुल प्रीत, सारा अली खान, अर्जुन रामपाल यांचा समावेश आहेत. गांजा बाळगण्याप्रकणी कॉमेडियन भारती सिंह आणि तिच्या पतीला अटक करण्यात आली होती.
दरम्यान याच प्रकरणी एनसीबीने मुंबईतील मुच्छड पानवाला यालाही समन्स बजावला होता. त्यानंतर चौकशी करुन त्याला अटक करण्यात आली आहे.