शहादा (प्रतिनिधी) नियंत्रण सुटून कार तीनवेळा उलटून झाडाला धडकली. या भीषण अपघात दोन तरुण जागीच ठार झाले. ही घटना शहादा डोंगरगाव रस्त्यावर महावीर अमरसिंग गिरासे स्कूलनजीक गुरुवारी सकाळी साडेनऊ वाजता घडली. अमरसिंग धनसिंग गिरासे (२९ रा. लोणखेडा व विजय श्रावण सोनवणे (२६ रा. डोंगरगाव, ता. शहादा) अशी मयतांची नावे आहेत.
अमरसिंग गिरासे हे आपल्या कारने शहादाकडून डोंगरगावकडे जात होते. साधारण सकाळी साडेनऊ वाजेच्या सुमारास महावीर इंग्लिश स्कूलच्या समोर काही अंतरावर गाडीवरील त्याचा ताबा सुटला. तशात पावसाच्या रिपरिपमुळे कार नियंत्रित न झाल्याने ती तीनवेळा उलटली आणि रस्त्याच्या बाजूला खड्डयात उलटून लिंबाच्या झाडाला धडकली. यामुळे कारमधील दोघं जण जागीच ठार झालेत.
यावेळी कारमधील एअरबॅग उघडल्या तरीही दोन्ही जण वाचू शकले नाहीत, असे प्रत्यक्षदर्शीनी सांगितले. दोन जेसीबी मागवून कारला खड्ड्यातून बाहेर काढण्यात आले.दरम्यान, डोंगरगाव येथील मयत विजय सोनवणे हा अमरसिंग गिरासे याच्याकडे कामाला असल्याची माहिती समोर येत आहेत. दोन्ही जण खासगी कामानिमित्त डोंगरगावकडे जात होते. शाळेजवळील रस्त्यावर गतिरोधक तयार करावे, अशी मागणी परिसरातील नागरिकांनी केली आहे.
