जळगाव प्रतिनिधी : “मराठी राजभाषा गौरव दिना”चे औचित्य साधून महाराष्ट्र नवनिर्माण सेनेच्या वतीने जळगाव महानगरपालिका संचालित मराठी मुलांची शाळा क्रमांक ३२ मध्ये एक स्तुत्य उपक्रम राबवण्यात आला. मनसे प्रमुख राज ठाकरे यांच्या आदेशानुसार, मराठी भाषेचा अभिमान आणि प्रसार करण्याच्या उद्देशाने येथील शिक्षक आणि विद्यार्थ्यांचे पारंपरिक पद्धतीने स्वागत करण्यात आले.
कार्यक्रमाची सुरुवात अत्यंत उत्साहात ‘महाराष्ट्र गीताने’ झाली. यावेळी शाळेतील शिक्षकांना आणि विद्यार्थ्यांना मनसे कार्यकर्त्यांच्या हस्ते फेटे बांधून सन्मानित करण्यात आले. मराठी संस्कृतीची ओळख असलेल्या फेट्यांमुळे शालेय परिसरात एक वेगळेच मांगल्याचे वातावरण निर्माण झाले होते. याप्रसंगी चिमुकल्यांना चॉकलेटचे वाटप करून त्यांचा आनंद द्विगुणित करण्यात आला.
या उपक्रमाचे सर्वात मोठे वैशिष्ट्य म्हणजे शाळा क्रमांक ३२ मधील ९५ टक्के विद्यार्थी हे मुस्लिम समाजातील आहेत. हिंदी भाषिक पार्श्वभूमी असूनही हे विद्यार्थी अत्यंत आवडीने आणि अभिमानाने मराठी भाषेचे शिक्षण घेत आहेत. “मराठी ही केवळ राजभाषा नसून ती संवादाची आणि संस्कृतीची भाषा आहे,” हे या विद्यार्थ्यांनी आपल्या उपस्थितीतून सिद्ध केले. मुस्लिम समाजातील मुलांचा मराठी भाषेप्रती असलेला हा ओढा आणि त्यांचे मराठीवरील प्रेम उपस्थित सर्वांसाठी कौतुकाचा आणि चर्चेचा विषय ठरला.
मराठी शाळांमधील विद्यार्थ्यांचे मनोबल वाढवणे आणि त्यांना मुख्य प्रवाहात आणणे हे आमचे उद्दिष्ट आहे. विशेषतः जिथे अमराठी भाषिक विद्यार्थी मराठी शिकत आहेत, तिथे त्यांचे कौतुक होणे गरजेचे आहे.”असे प्रतिपादन महाराष्ट्र नवनिर्माण सेनेचे जिल्हाध्यक्ष ॲड. जमील देशपांडे यांनी या प्रसंगी केले.
या वेळी मनसेच्या वतीने एक महत्त्वपूर्ण निर्धार व्यक्त करण्यात आला. आगामी काळात जळगाव महानगरपालिकेच्या अंतर्गत येणाऱ्या सर्व मराठी शाळांच्या गुणवत्ता वाढीसाठी आणि तेथील समस्या सोडवण्यासाठी मनसेतर्फे विशेष ‘मनुष्यबळ आणि लक्ष’ केंद्रित करण्यात येणार असल्याचे सांगण्यात आले. मराठी शाळा टिकल्या पाहिजेत आणि तिथल्या विद्यार्थ्यांना दर्जेदार सुविधा मिळाल्या पाहिजेत, ही भूमिका यावेळी स्पष्ट करण्यात आली.
या उपक्रमामुळे शाळा क्रमांक ३२ मधील विद्यार्थी आणि शिक्षकांमध्ये उत्साहाचे वातावरण दिसून आले. मराठी राजभाषा दिनानिमित्त राबवण्यात आलेल्या या सर्वसमावेशक उपक्रमाचे शहरभरात स्वागत होत आहे.
शाळेचे मुख्याध्यापक संदीप बांगर यांनी आपले मनोगत व्यक्त केले. श्रीकृष्ण बाविस्कर, शिक्षिका श्रीमती मीनाक्षी बदर,तुषार चौधरी, संदीप रोकडे हे शिक्षक वर्ग उपस्थित होते.
या प्रसंगी महाराष्ट्र नवनिर्माण सेनेचे जिल्हाध्यक्ष ॲड जमील देशपांडे, महानगराध्यक्ष किरण तळले, उपमहा नगर अध्यक्ष श्रीकृष्ण मेंगडे,ललित शर्मा,राजेंद्र निकम,विभाग अध्यक्ष आशुतोष जाधव खुशाल ठाकूर दीपक राठोड,विकास पाथरे,ऋषिकेश मेंगडे. उपस्थित होते.
श्रीकृष्ण मेंगडे यांनी आभार प्रदर्शन केले.
