नवी दिल्ली (वृत्तसंस्था) देशात कोरोनाच्या रुग्णांची रोज चिंताजनक वाढ होताना दिसत आहे. त्यामुळं कोरोना लसीकरणाची पूर्ती करण्यासाठी आणि वेग वाढवण्यासाठी सर्व शासकीय आणि खासगी लसीकरण केंद्रावर एप्रिल महिन्यामध्ये सुटीच्या दिवशीही लस दिली जाणार आहे. एप्रिल महिन्यात लसीकरण केंद्र शासकीय आणि इतर सुटीच्या दिवशीही सुरूच राहणार आहेत.
देशभरात आजपासून ४५ वर्षांवरील नागरिकांच्या कोरोना लसीकरणाला सुरुवात झाली आहे. देशात कोरोनाच्या रुग्णांची रोज चिंताजनक वाढ होताना दिसत आहे. त्यामुळं केंद्र सरकारनं महत्वाचा निर्णय घेतला आहे. सार्वजनिक आणि खाजगी लसीकरण केंद्रांवर एप्रिल महिन्यामध्ये राजपत्रित सुट्टीसह सर्व सुट्ट्यांच्या दिवशीही लसीकरण केले जाणार असल्याचे केंद्र सरकारकडून सांगण्यात आलं आहे. देशात वाढत्या कोरोनाच्या पार्श्वभूमीवर हा निर्णय घेतला गेल्याचे सूत्रांकडून कळले आहे. कोरोनाचा वाढता संसर्ग पाहता आजपासून देशातील ४५ वर्षांवरील सर्व नागरिकांना कोरोनाची लस देण्यास सुरुवात झाली आहे. दरम्यान, कोरोनानं पुन्हा एकदा आपलं डोकं वर काढलं आहे. देशात कोरोनाची दुसरी लाट आल्याचं बोलंलं जात आहे. अशा परिस्थितीत राज्य आणि केंद्र सरकार कोरोनापासून कसा बचाव करता येईल यावर पूर्ण लक्ष देत आहे. त्यासाठी लस हा सर्वात उत्तम मार्ग असून सर्वांचं लसीकरण करणं आवश्यक असल्याचंही तज्ज्ञांचं म्हणणं आहे.
कोविड १९ लस नोंदणीसाठी आता को-विन पोर्टल देखील अधिक कार्यक्षम करण्यात आले आहे. आता दररोज एक कोटी नोंदणी या पोर्टलवर स्वीकारली जाणार आहे. यासोबतच दररोज ५० लाख लोकांच्या लसीची नोंद होऊ शकते. ४५ वर्षांपेक्षा जास्त वयाच्या लोकांचे लसीकरण १ एप्रिलपासून सुरू केले जात आहे. त्यामुळे नोंदणी वाढण्याची शक्यता असल्यामुळे या पोर्टलमध्ये सुधारणा करण्यात आल्या आहेत.
