चोपडा (प्रतिनिधी) यावल तालुक्यातील डांभुर्णी शिवारात बिबट्याने 2 वर्षीय चिमुरडीवर हल्ला करत फस्त केल्याची घटना समोर आली आहे. दीड महिन्यातच ही दुसरी घटना आहे.
याबाबत अधिक माहिती अशी की काल दिनांक 16 एप्रिल 2025 रोजी रात्री एक वाजेच्या सुमारास यावल तालुक्यातील डांभुरणी शिवारात असलेल्या प्रभाकर चौधरी यांच्या शेतात ठेलारी समाजांतील मेंढपाळांची मुलगी रत्नाबाई सतिश रुपनर (वय 2 वर्षे) असलेल्या मुलीला बिबट्या उचलून घेऊन गेला आणि चिमुरडीला फस्त केले.
वनविभागाने बिबट्याचा त्वरित पिंजरे लावून बंदोबस्त करावा तसेच त्याला पकडण्यासाठी विशेष प्रशिक्षित पथकाची नेमणूक करावी, अशा सूचना आमदार चंद्रकांत सोनवणे यांनी केली असून घटनास्थळी भेट दिली. तसेच जिल्हाधिकारी यांच्याशी संपर्क साधून सदर घटनेबाबत अवगत केले. याप्रसंगी तहसीलदार मोहनमाला नाझीरकर, सहाय्यक वनसंरक्षक समाधान पाटील, यावल पोलीस निरीक्षक प्रदीप ठाकूर यांच्यासह परिसरातील शेतकरी तसेच अनेकजण उपस्थित होते.
यावेळी सदर कुटुंबीयांना म्हणजेच मयताच्या वारसांना तात्काळ आपण भरीव मदत उपलब्ध करून देऊ, असे देखील आमदार चंद्रकांत सोनवणे यांनी सांगितले. तर वनविभागाने त्वरित याचा प्रस्ताव तयार करावा, अशी सूचनाही दिली. यावेळी वनविभागाचे सर्वच अधिकारी हजर होते.
दरम्यान, चिमुरडीच्या नातेवाईकांनी एकच टाहो फोडला होता. तसेच आमदार चंद्रकांत सोनवणे यांनी गावकऱ्यांना आवाहन केले की, बिबट्या पिंजऱ्यात येत नाही तोपर्यंत गावकऱ्यांनी आपल्या स्वतःचे संरक्षण करावे आणि जागृत रहावे.
