नवी दिल्ली (वृत्तसंस्था) ओमीक्रॉनच्या धास्तीने उत्तर प्रदेशमधील कानपूर येथे एका डॉक्टरनेच पत्नी आणि दोन मुलांची हातोड्याने ठेचून निर्घृण हत्या केल्याची भयंकर घटना घडली आहे. हत्येनंतर त्याने आपल्या डायरीत आता मृतदेह मोजायचे नाही, कारण ओमायक्रॉन सर्वांना मारणार आहे, असं लिहिलं आहे. पोलीस फरार आरोपी पतीचा शोध घेत आहेत.
आरोपी पती कानपूरच्या रामा मेडिकल कॉलेजमध्ये फॉरेंसिक मेडिसीन विभागाचा प्रमुख होता. तो आपल्या कुटुंबाची हत्या करून फरार झालाय. हत्येनंतर आरोपीने आपल्या जुळ्या भावाला व्हॉट्सअप मेसेज करून या हत्येबाबत पोलिसांना माहिती देण्याचा मेसेज केला. यानंतर पोलिसांना एका बंद फ्लॅटमध्ये ३ मृतदेह आढळले. यात आरोपीच्या पत्नी चंद्रप्रभासह इंजिनीअरींगचं शिक्षण घेणारा मुलगा शिखर सिंह आणि मुलगी खुशी सिंह यांचा मृतदेह आढळला. आरोपीने आधी चहातून बेशुद्ध करण्याचं औषधं दिलं आणि मग हातोडीने वार करून हत्या केल्याचा संशय आहे.
पोलीस उपायुक्त म्हणाले, “कल्याणपूर पोलीस स्टेशन हद्दीत इंदिरानगर येथे एका हत्येबाबत माहिती मिळाली होती. त्यानंतर आम्ही सर्व अधिकारी घटनास्थळावर पोहचलो. प्राथमिक तपासात एक महिला आणि तिच्या दोन मुलांची हत्या करण्यात आली. त्यांचे मृतदेह घरात आढळले. या पीडित महिलेचा पती डॉक्टर सुनिलने त्याच्या भावाला एक मेसेज पाठवला आहे. त्यात आरोपीने नैराश्यातून असं कृत्य केल्याची माहिती दिली.
