धुळे (प्रतिनिधी) रक्षाबंधनाचा सण सर्व भाऊ-बहिणींसाठी विशेष असतो. पण हाच दिवस दोन बहिणींनीसाठी काळा दिवस ठरला. या आनंदाच्या सणाच्या दिवशीच दोघं बहिणींनी त्यांचा लाडका भाऊ गमावल्यानंतर काळीज चिरणारा आक्रोश केला.
शिंदखेडा येथील प्रविण कांतीलाल जैन (३०) या तरुणाचे अचानक हृदयविकाराच्या झटक्याने निधन झाले. त्यांच्या शिरपूर येथील सविता ललित जैन ( कोचर ) व निमगुळ येथील चंदाबाई लालचंद जैन या दोन चूलतबहिणी आहेत. प्रविण यांचे बुधवारी (दि. ३०) दोन्ही बहीणींशी फोनवर बोलणे झाले होते. त्यावेळी प्रविणने राखी बांधण्यासाठी त्यांना शिंदखेडा येथे येण्याचा आग्रह धरला. त्यानुसार गुरुवारी दोघी बहिणी शिंदखेडा येथे प्रविणकडे येण्याची तयारी करीत असतांनाच सकाळी फोनवरून प्रविण यांच्या निधनाची बातमी मिळाली. यामुळे दोन्ही बहिणींनी एकच हंबरडा फोडला.
दोघी बहिणींनी शिंदखेडा गाठून लाडक्या भावाच्या हाताला शेवटची राखी बांधली. यावेळी उपस्थितांना अश्रू अनावर झाले होते. प्रविण हे दोन्ही बहिणींचे चुलतभाऊ होते. त्यांना बहिण नसल्याने या दोन्ही बहिणी सख्या बहिणींप्रमाणे होत्या. प्रविण यांच्या पश्चात आई. वडील, भाऊ तसेच पुतणे असा परिवार आहे. प्रविण हे सायकलवर किरकोळ किराणा सामुग्री विक्री करून उदरनिर्वाह करीत होते. रक्षाबंधनाच्या दिवशीच भावाचे हृदयविकाराच्या झटक्याने अचानक निधन झाल्याने दोन बहिणींवर दुःखाचा डोंगर कोसळला.
