धरणगाव (प्रतिनिधी) अयोध्येतील श्रीराम मंदिर प्रतिष्ठापने निमीत्त २१ जानेवारी रोजी दुपारी ३ वाजता श्री बालाजी वहन व्यवस्थापक मंडळातर्फे सर्वसमावेशक भव्य शोभायात्रेचे आयोजन करण्यात आले आहे. मंडळाचे अध्यक्ष दिलीप रामू पाटील यांच्या अध्यक्षते खाली झालेल्या विशेष सभेत नियोजन करण्यात आले.
आनंदोत्सव साजरा करण्यासाठी श्री बालाजी मंदिर परिसरात विद्युत रोषणाई, रांगोळ्या, शोभायात्रेच्या मार्गावर ठिकठिकाणी ध्वज उभारणी, शालेय विद्यार्थ्यांचे रामरक्षा पठण, महिला मंडळ व राजपुत युवक मंडळातर्फे भजन संध्या, दिपोत्सव अशा विविध कार्यक्रमांचे आयोजन करण्याबाबत निर्णय घेण्यात आला. या भव्य शोभायात्रेत संपूर्ण गावांचा सहभाग व्हावा म्हणून सर्व
समाज पंच मंडळ, सर्व संघटना, सर्व शाळा, महाविद्यालये, विविध अध्यात्मिक पंथ, सर्व राजकीय पक्ष, कीर्तनकार यांना पाचारण करण्यात आले आहे. या शोभायात्रेसाठी मंडळाच्या वहनोत्सवासाठी वापरण्यात येणाऱ्या गाडीवर प्रभु श्रीरामाची मुर्ती विराजमान केली जाईल. तसेच सजीव देखावे उभे करून गावातील प्रमुख रस्त्यांवर सजावट व स्वागत कमानी उभ्या केल्या जातील.
बॅन्ड पथकाच्या सहाय्याने रामधुन वाजवण्यात येणार असल्यामुळे डीजे व लेझीम पथक यांचा समावेश करू नये. असे ठरवण्यात आले. या सभेत गुलाबराव वाघ, भानुदास विसावे, पंडीत चौधरी, माधवराव पाटील, जिवन बयस व अन्य विश्वस्तांनी चर्चेत भाग घेतला. या सर्व उपक्रमांमध्ये सर्व जनतेने सहभागी व्हावे. असे आवाहन मंडळातर्फे करण्यात आले आहे.
