जळगाव (प्रतिनिधी) तीन पिस्तुले घेऊन आलेल्या किशोर रामदास कोळी (वय ३०, रा. कांचन नगर) या तरुणाच्या स्थानिक गुन्हे शाखेच्या पथकाने शुक्रवारी सायंकाळी बजरंग बोगदा परिसरातून शिताफीने अटक केली आहे. त्याच्याकडून तीन गावठी पिस्तुलांसह चार जीवंत काडतूस हस्तगत करण्यात आले आहेत. याप्रकरणी जिल्हापेठ पोलिसात गुन्हा दाखल करण्यात आला असून त्याला दोन दिवसाची पोलीस कोठडी सुनावण्यात आलीय.
शहरातील कांचन नगरातील भैय्याच्या वखारीजवळ राहणार किशोर कोळी हा तरु ण बिगारी काम करतो. पिस्तुल विक्री करण्यासाठी शुक्रवारी सायंकाळच्या सुमारास बजरंग बोगदा परिसरात फिरत होता. याबाबतची माहिती मिळताच स्थानिक गुन्हे शाखेच्या पथकाने संशयीरित्या फिरत असलेल्या किशोर कोळी याला ताब्यात घेतले. त्याची कसून चौकशी केली असता, त्याच्या कंबरेला दोन गावठी पिस्तुल मिळून आले. तसेच त्याच्याजवळ असलेल्या (एमएच १९ सीए ००४०) क्रमांकाच्या दुचाकीच्या सीटी खालून एक असे एकूण तीन पिस्तुल पोलिसांनी जप्त केली. याप्र्रकरणी त्याच्याविरुद्ध जिल्हापेठ पोलिसात गुन्हा दाखल करण्यात आला आहे. पुढील तपास स्थानिक गुन्हे शाखेचे सहाय्यक पोलीस निरीक्षक अमोेल मोरे हे करीत आहेत. संशयित किशोर कोळी याच्याविरुद्ध जिल्हापेठ पोलिसात गुन्हा दाखल झाल्यानंतर त्याला शनिवारी दुपारी न्यायालयात हजर करण्यात आले. न्यायालयाने त्याला दोन दिवसांची पोलीस कोठडी सुनावली.
ही कारवाई पोलीस अधीक्षक डॉ. महेश्र्वर रेड्डी यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक किसन नजन पाटील यांच्यासह सपोनि अमोल मोरे, पोउनि गणेश वाघमारे, गणेश चौभे, विजयसिंग पाटील, विजय पाटील, सचिन महाजन, अक्रम शेख, महेश महाजन, किरण चौधरी, सुधाकर अंभोरे, प्रितम पाटील, ईश्र्वर पाटील, प्रियंका कोळी यांच्या पथकाने केली.
