जळगाव (प्रतिनिधी) तालुक्यातील खेडी शिवारातील पडक्या विहिरीत एका ४५ वर्षीय व्यक्तीची उडी घेऊन आत्महत्या केल्याची घटना घडली आहे. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आलीय.
पोलिसांनी दिलेल्या माहितीनुसार, नंदलाल सुरेश गोसावी (वय-४५रा.दिनकर नगर) ट्रॅक्टर चालक होता. सकाळी नेहमीप्रमाणे कामावर निघतांना आई सुशिलाबाई यांना ट्रॅक्टर शोरूमला जाऊन येतो असे सांगून शुक्रवार (ता.२ जुलै) रोजी सकाळी १० वाजता घरातून निघाले होते. कुणाला काहीही न सांगता त्यांनी तालुक्यातील खेडी शिवारातील मनुदेवी मंदिराजवळील जनार्दन खडके यांच्या शेतातील पडक्या विहिरीत उडी घेऊन आत्महत्या केली. शेतातील मजूर आज सकाळी कामावर आल्यानंतर विहिरीतून दुर्गंधी येत असल्याने लक्षात येताच विहिरीत डोकावून पाहिले असता मृतदेह तरंगताना दिसून आला. पोलीस पाटील आनंदा बिऱ्हाडे यांनी तातडीने पोलीसांना खबर दिली. एमआयडीसी पोलीस कर्मचारी नितीन पाटिल घटनास्थळी धाव घेतली. सायंकाळी ४ वाजता मृतदेह विहिरीतून काढण्यात आला. व्हॉटस्ॲपवर मृतदेहाचे फोटो पोलिसांनी पाठवले होते. नातेवाईक, परिचीतांनी मृतदेहाची ओळख पटवली आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
