भुसावळ (प्रतिनिधी) स्टेट बँकेच्या अकाउंटचे केवायसी अपडेट करण्याच्या नावाखाली एका सेवानिवृत्त कर्मचाऱ्याची तब्बल एक लाखांत फसवणूक झाल्याची घटना भुसावळात घडली आहे. या प्रकरणी बाजारपेठ पोलीस स्टेशनला अज्ञात व्यक्ती विरोधात गुन्हा दाखल करण्यात आला आहे.
शहरातील जामनेर रोडवरील पंढरीनाथ नगर येथील रहिवासी असलेले सेवानिवृत्त कर्मचारी गौतम नामदेव खरे (वय 63) यांना 22 जानेवारी 2023 रोजी एका मोबाईल वरून मॅसेज आला की, आपले स्टेट बँक ऑफ इंडियाचे अकाउंट केवायसी अपडेट करायचे आहे. त्यासाठी खालील लिंक ओपन करून माहिती भरावी. गौतम खरे यांना मॅसेज खरा वाटल्याने त्यांनी लिंक ओपन करून सर्व माहिती त्यात भरली.
यानंतर त्यांच्या खात्यातील तब्बल एक लाख रुपये अज्ञात व्यक्तीने परस्पर काढून घेतले. पैसे खात्यातून पैसे कपात झाल्याचे लक्षात येताच खरे यांनी पोलीस स्टेशनला धाव घेत अज्ञात व्यक्ती विरोधात बाजारपेठ पोलीस स्टेशनला फसवणुकीचा गुन्हा दाखल केला. तपास पोलीस निरीक्षक राहुल गायकवाड हे करीत आहे.
