वरणगाव प्रतिनिधी : सनातन धर्माची बळकटी आणि जनमानसात हनुमान चालीसेचे महत्त्व रुजविण्याच्या उद्देशाने वरणगाव येथील वासुदेव परिवाराच्या वतीने आयोजित करण्यात येणाऱ्या संगीतमय सामूहिक हनुमान चालीसा पठण उपक्रमाची वर्षपूर्ती शनिवार, दि. १४ रोजी साजरी करण्यात येणार आहे. हा उपक्रम ऊँ सिद्धगुरु नित्यानंद प्रतिष्ठान अंतर्गत असलेल्या अध्यात्मिक केंद्र ‘रेवा कुटी’, वरणगाव येथे दर महिन्याच्या दुसऱ्या शनिवारी सकाळी ७ ते ९ या वेळेत नियमितपणे राबविण्यात येतो.
डॉ. नितु पाटील व सहकारी वर्ग यांच्या पुढाकारातून दि. ८ फेब्रुवारी २०२५ रोजी सुरू झालेल्या या अध्यात्मिक उपक्रमांतर्गत आतापर्यंत एका वर्षात एकूण २,८५० संगीतमय हनुमान चालीसा पाठ पूर्ण करण्यात आले आहेत. हनुमान जन्मोत्सवाच्या दिवशी विशेष कार्यक्रमांतर्गत हनुमान चालीसा पठणासोबत हवनही करण्यात येते. यावेळी भक्तांच्या दर्शनासाठी ‘राम सेतू दगड’ ठेवण्यात येतो तसेच तीर्थ प्रसादाचे वाटप केले जाते.
प्रत्येक उपक्रमाची सुरुवात पंचमुखी हनुमान पूजन व सामूहिक रामस्तुतीने होते. त्यानंतर सर्व भक्तांच्या सहभागातून ११ वेळा संगीतमय हनुमान चालीसेचे पाठ केले जातात. शेवटी आरती व प्रसाद वाटप करून कार्यक्रमाची सांगता करण्यात येते.
हा उपक्रम यशस्वी करण्यासाठी दीपक फेंगडे, कमलेश येवले, विवेक पाटील, अनिकेत चव्हाण, योगेश मगरे, गोलू तडवी, उमेश माळी, मनोज गोसावी, चंद्रकांत बढे, सुयोग चौधरी, कृष्णा माळी, राम शेटे, राहुल माळी आदी सदस्यांचे मोलाचे योगदान लाभत आहे.
दर महिन्याच्या दुसऱ्या शनिवारी अविरतपणे सुरू असलेल्या या उपक्रमाबाबत परिसरातील नागरिकांमध्ये जनजागृती करून सहभाग वाढविण्याचा वासुदेव परिवाराचा मानस असून, एक लक्ष संगीतमय हनुमान चालीसा पाठ पूर्ण करण्याचा संकल्प घेतल्याची माहिती वासुदेव परिवाराचे सदस्य कमलेश येवले यांनी दिली.
