जळगाव (प्रतिनिधी) जळगाव जिल्हयातील जिल्हा ग्रामीण विकास यंत्रणेअंतर्गत प्रधानमंत्री आवास योजनेच्या ड यादीतील झालेल्या घोटाळ्याची चौकशी करणेसाठी शासन स्तरावरून आदेश व्हावेत, अशी मागणी माजी जिल्हाध्यक्ष तथा राष्ट्रवादी युवक काँग्रेसचे प्रदेश प्रवक्ते योगेश देसले यांनी उपमुख्यमंत्री अजित पवार यांच्याकडे निवेदनाद्वारे केली आहे.
निवेदनात म्हटले आहे की, जळगाव जिल्हा विकास यंत्रणे अंतर्गत जिल्हयातील पंचायती समित्यांच्या माध्यमातून राबविण्यात येणाऱ्या प्रधानमंत्री घरकुल आवास योजना यादी ड मध्ये चुकीचा सर्वेक्षण अहवाल दिल्यामुळे खरे व गरजू लाभार्थी वंचित राहिलं आहे. यादी क्र. १ व २ मध्ये गरजू लाभार्थीचे नावे समाविष्ट करण्यात आली होती. परंतु अंतिम यादीतून त्या ख-या व गरजू लाभार्थ्यांना वगळण्यात आले आहे. यामध्ये सर्वेक्षण अहवाल तयार करणारी यंत्रणा व ग्रामपंचायतीचे ग्रामसेवक तसेच स्थानिक लोकप्रतिनिधी इतर अधिकारी यांच्या संगनमताने मनमानी पध्दतीने यादी मंजूर केल्या आहेत. या सर्व प्रकरणाची सखोल माहिती मुख्य कार्यकारी अधिकारी जळगाव व जिल्हा विकास यंत्रणा अधिकारी यांना निवेदनाव्दारे दिले असता हे शासन स्तरावरून यंत्रणेमुळे झाले आहे. असे उत्तर देण्यात आले.
वंचित व गरजू लाभार्थ्यांना घरकुल योजनेचा लाभ मिळावा व आपल्या माध्यमातून न्याय मिळावा यासाठी या प्रकरणाची सखोल चौकशी करणेकामी आपल्या स्तरावरून आदेश व्हावेत, अशी मागणी यात केली आहे.
