नशिराबाद (सुनिल महाजन) येथील अखिल भारतीय सकल मराठा समाज मंडळ अण्णा नगर आणि शिव सह्याद्री प्रतिष्ठान यांच्या संयुक्त विद्यमाने दरवर्षी शिवजयंती महोत्सवाचे भव्यदिव्य आयोजन करण्यात आले आहे.
गेल्या पाच वर्षापासूनची अखंड परंपरा जपत यंदाही नशिराबाद येथे शिवजयंती महोत्सवाचं आयोजन करण्यात आले असून या कार्यक्रमासाठी तब्बल 100 हुन अधिक कलाकार व्यासपीठावर आपले सादरीकरण करणार आहेत. दि. 25 फेब्रुवारी 2023 रोजी शनिवारी नशिराबाद येथील अण्णा नगर परिसरात आठवडे बाजारातील खालची आळीच्या मैदानावर अगळ्या-वेगळ्या पद्धतीने शिवजयंती महोत्सवाचे आयोजन करण्यात आलं आहे. कार्यक्रमासाठी मराठा समाज अध्यक्ष तसेच नगरसेवक आणि उपसभापती नगर नियोजन समिती सुरतचे सोमनाथ मराठे हे कार्यक्रमाचे अध्यक्षस्थानी आहेत. तर आर सी बाफना ज्वेलर्सचे राजकुमार जी बाफना आणि उद्योजक मंडळ जळगाव चे अध्यक्ष आनंदराव मराठे यांची विशेष उपस्थिती लाभणार आहे. त्याचबरोबर शिवरत्न आणि शिवचरित्राचे गाढे अभ्यासक दादा नेवे अर्थात दुर्गादास नेवे यांची देखील प्रमुख उपस्थिती लाभणार आहे. तसेच समाजातील शैक्षणिक, सामाजिक, राजकीय, शेती ,वैद्यकीय,, सहकार ,आर्थिक, आध्यात्मिक इत्यादी क्षेत्रातील मान्यवर मंडळी या कार्यक्रमाला उपस्थिती देणार आहेत.
या कार्यक्रमाचे वैशिष्ट्य म्हणजे यात सुप्रसिद्ध कथ्थक नृत्य गुरु डॉ. अपर्णा भट कासार, भरतनाट्यम गुरु नेहा जोशी त्यांचे शिष्य गण विशेष कार्यक्रम सादर करतील. मुंबई येथील ‛बहिणाबाई चौधरी’ गीतांच्या व्हिडिओ अल्बम आणि लेवा बोली भाषेतील ‛लग्नाची गाणी’ अल्बम फेम मनीषा कोल्हे असोदेकर आणि त्यांच्यासह इतर सहकलाकार देखील कार्यक्रमामध्ये आपले सादरीकरण करणार आहेत. यासह नशिराबाद येथील ग्लोबल इंग्लिश मिडीयम स्कूलचे बालकलाकार उत्कृष्ट नृत्य सादर करणार आहेत. याशिवाय काही नामवंत कलाकारांचे द्वारा पोवाडे देशभक्तीपर गीत आणि काही ‛स्वगत’ एकपात्री प्रयोग देखील या व्यासपीठावर सादर केले जाणार आहे, अशी माहिती शिव सह्याद्री प्रतिष्ठानचे संस्थापक अध्यक्ष गणेश चव्हाण आणि मराठा पंच मंडळचे अध्यक्ष हेमंत मराठे यांनी दिली आहे.
शिवाजी महाराजांच्या शौर्याची गाथा जनसामान्यांच्या स्मरणात रहावी,यासाठी प्रतिष्ठानने शिवाजी महाराजांचा अश्वारूढ भव्य पुतळा इमारतीच्या उंच छतावर उभारला आहे. किल्ल्याप्रमाणे घराला कमान तयार करण्यात आलेली आहे.हे दृष्य जाणाऱ्यांचे लक्ष वेधून घेते. दरवर्षी तब्बल तीन हजाराहून अधिक शिवप्रेमी या कार्यक्रमाला उपस्थिती देत असतात. विशेष म्हणजे सर्व धर्माचे समाज बांधव शिवाजी महाराजांच्या या शिवजयंती सोहळ्याला आवर्जून उपस्थित असतात. यंदा हा आकडा वाढण्याची शक्यता आयोजकांनी वर्तवली आहे.
