नवी दिल्ली (वृत्तसंस्था) हिजाब प्रकरणावर आज कर्नाटक उच्च न्यायालयात सुनावणी झाली असून, कोर्टाचे याप्रकरणी महत्त्वपूर्ण निकाल दिला आहे. हिजाब हा इस्लामचा अनिवार्य भाग नाही, असे कोर्टाने म्हटले आहे. कोर्टाच्या या निकालानंतर एमआयएमचे अध्यक्ष खासदार असदुद्दीन ओवैसी यांनी भाष्य केले आहे. कर्नाटक उच्च न्यायालयाने दिलेल्या निकालाचा आपण विरोध करतो. असे ओवैसी यांनी म्हटले आहे.
कोर्टाच्या निर्णयाशी मी सहमत नाही – असदुद्दीन ओवेसी
कोर्टाच्या निर्णयाशी मी सहमत नाही, हा माझा अधिकार आहे, असे ओवेसी म्हणाले. हिजाब घालायला काय हरकत आहे? हे मला समजत नाहीए. हिजाब बंदी राज्यघटनेच्या अनुच्छेद १५ चे उल्लंघन करते. देशातील प्रत्येक नागरिकाला धर्म, संस्कृती, अभिव्यक्ती आणि कला स्वातंत्र्य देते. कोर्टाच्या या निर्णयाचा मुस्लिम महिलांवर विपरीत परिणाम होणार आहे. ठिकठिकाणी मुस्लिम मुलींना टार्गेट केले जाईल. आधुनिक होण्याच्या शर्यतीत आपण धार्मिक प्रथा विसरू शकत नाही, असे ओवेसी म्हणाले.
मेहबूबा मुफ्ती म्हणाल्या…
जम्मू-काश्मीरच्या माजी मुख्यमंत्री आणि पीडीपी प्रमुख मेहबूबा मुफ्ती यांनीही कोर्टाच्या निर्णयावर प्रश्न उपस्थित केले आहेत. ‘कर्नाटक हायकोर्टाचा हिजाब बंदीचा निर्णय अतिशय निराशाजनक आहे. एकीकडे आपण महिलांच्या सक्षमीकरणाविषयी बोलतो. दुसरीकडे आपण त्यांचा साधा हक्क हिरावून घेत आहोत. हा केवळ धर्माचा मुद्दा नाही, तर निवड स्वातंत्र्याचाही मुद्दा आहे, असे मेहबूबा मुफ्ती सोशल मीडियावर म्हणाल्या.
