पाचोरा (प्रतिनिधी) घराच्या छतावरुन पाय घसरून पडल्याने ४७ वर्षीय शेतकऱ्याचा दुर्दैवी मृत्यू झाल्याची घटना तालुक्यातील कुरंगी येथे घडली आहे. सुभाष चिंधा पाटील (वय ४७), असे मयत शेतकऱ्याचे नाव आहे.
या संदर्भात अधिक असे की, सुभाष पाटील हे उन्हाळ्याचे दिवस असल्याने २० रोजी रात्री आपल्या घराच्या छतावरच झोपले होते. २१ मे रोजी पहाटेच्या सुमारास अंदाज चुकल्याने त्यांचा पाय घसरला व ते छतावरुन खाली पडले. त्यानंतर सुभाष पाटील यांना तत्काळ पाचोरा ग्रामीण रुग्णालयात दाखल केले. परंतु, ग्रामीण रुग्णालयातील डॉक्टरांनी सुभाष पाटील यांना मृत घोषित केले. या घटनेप्रकरणी पाचोरा पोलिस स्टेशनमध्ये अकस्मात मृत्यूची नोंद करण्यात आली असून पुढील तपास पो. कॉ. भगवान बडगुजर हे करीत आहेत. सुभाष पाटील यांच्या पश्चात आई, पत्नी, मुलगा, मुलगी, भाऊ, दोन बहिणी असा परिवार आहे.
