मुंबई (वृत्तसंस्था) मुंबईत बांद्रा-कुर्ला कॉम्प्लेक्समध्ये बांधल्या जाणाऱ्या उड्डाणपूलाचा काहीसा भाग आज पहाटेच्या सुमारास कोसळला. ही घटना सकाळी चारच्या सुमारास घडली. या घटनेत २१ जण जखमी झाल्याची माहिती आहे. जखमींना व्ही.एन. देसाई हॉस्पिटलमध्ये दाखल करण्यात आले आहे. ज्यावेळी हा अपघात झाला त्यावेळी पुलावर २२ ते २४ मजूर काम करत होते.
पोलिसांनी दिलेल्या माहितीनुसार, मुंबईचा बीकेसी परिसरात एमएमआरडीएच्या पुलाचं काम सुरु होतं. पहाटे साडेचारच्या सुमारास पुलाचा गर्डर कोसळला. क्रेनच्या सहाय्यानं अत्यंत सावकाश काम सुरू असताना अचानक दाब कमी झाल्यानं ही दुर्घटना घडल्याचं बोललं जातय. त्यावेळी या पुलावर २२ ते २४ कामगार काम करत होते. त्यामध्ये कंत्राटदार जे.पी. इन्फ्राचे दोन अभियंताही सामिल होते. पूल कोसळला त्यावेळी काही कामगारांनी घाबरुन जवळच्या पाण्याच्या टाकीत उडी मारली, तर काहीजण पुलाला असलेल्या सळईला पकडून लटकले. तर या पूल दुर्घटनेत १३ ते १४ जण अडकून जखमी झाले आहेत. जखमींवर जवळच्याच व्ही. एन. देसाई रुग्णालयात उपचार सुरु आहेत.
