जळगाव (प्रतिनिधी) जळगावला करण पवार विजयी होतील, असा माझ्याकडे रिपोर्ट आला असल्याचे सांगत राष्ट्रवादीचे सर्वेसर्वा शरद पवार यांनी शिवसेना उबाठा गटाचे जळगाव लोकसभा मतदारसंघातील उमेदवार करण बाळासाहेब पाटील-पवार यांना आशीर्वाद दिलेत.
रावेर लोकसभा मतदार संघात श्रीराम पाटील व जळगाव लोकसभा मतदारसंघात करण बाळासाहेब पाटील हे दोन उमेदवार महाविकास आघाडीने दिले आहेत. नुकतेच शरद पवार यांनी चोपडा, भुसावळ, मुक्ताईनगर येथे श्रीराम पाटील यांच्यासाठी सभा घेतल्या. शरद पवार हे जळगाव जिल्हा दौऱ्यावर आले असता शिवसेना उबाठा गटाचे जळगाव लोकसभा मतदारसंघातील उमेदवार करण बाळासाहेब पाटील-पवार यांनी शरद पवार यांची जळगाव विमानतळावर भेट घेतली. यावेळी करण पाटील या तरुणाने माझी पंधरा वर्षांपूर्वी भेट घेतल्याचे शरद पवार यांनी सांगताच अनेकांना धक्का बसला.
करण पाटील यांचे आजोबा कै. भास्करराव पाटील हे माझे सभागृहातील सहकारी होते. तसेच करण पाटील यांचे काका माजी मंत्री डॉ. सतिष अण्णा पाटील हे तर माझे विश्वासू शिलेदार असल्याचेही शरद पवार यांनी सांगितले. एवढेच नव्हे तर बारामती व पारोळ्याचे पवार विजयी होतील असे सूचक व्यक्तव्य शरद पवार यांनी केले. दरम्यान, पवार यांच्यासारख्या ज्येष्ठ नेत्याने आशीर्वाद दिल्यामुळे तरुण उमेदवार असलेल्या करण पाटील यांचे मनोबल कमालीचे उंचावले आहे.
