मुंबई (वृत्तसंस्था) नायर रूग्णालयातील डॉ. पायल तडवी आत्महत्या प्रकरणी तिन्ही महिला डॉक्टरांना टोपीवाला राष्ट्रीय वैद्यकीय महाविद्यालयातून शिक्षण सुरू ठेवण्यास सर्वोच्च न्यायालयाने परवानगी दिली आहे.
हेमा अहुजा, भक्ती मेहर आणि अंकिता खंडेलवाल या तिघींवर तडवीचा जातीवरून छळ केल्याचा आणि तिला आत्महत्येस प्रवृत्त केल्याचा आरोप आहे. या तिघी स्त्रीरोग आणि प्रसूतिशास्त्र विषयातून पदव्युत्तर शिक्षण घेत असून, त्यांनी तीनपैकी दोन वर्षांचा अभ्यासक्रम पूर्ण केला आहे. आरोपींना त्यांचे शिक्षण सुरू ठेवण्याची परवानगी द्यायला हवी. खटला प्रलंबित राहिल्यास त्याचा त्यांच्या करिअरवर परिणाम होऊ शकतो, असे न्यायमूर्ती उदय लळित, न्यायमूर्ती विनीत शरण आणि न्यायमूर्ती अजय रस्तोगी यांच्या खंडपीठाने स्पष्ट केले.
दरम्यान, डॉ.पायल तडवी आत्महत्या प्रकरणी रॅगिंग करणाऱ्या तिन्ही महिला डॉक्टरला पोलिसांनी अटक करण्यात आली होती. या घटनेची महाराष्ट्र राज्य महिला आयोगानेही गंभीर दखल घेतली होती. याप्रकरणी नायर हॉस्पिटलच्या अधिष्ठातांना नोटीस बजावण्यात आली होती. या प्रकरणी नायर हॉस्पिलमधील स्त्रीरोग विभाग प्रमुख डॉ. यी चिंग लिंग, वरिष्ठ निवासी डॉक्टर डॉ. हेमा अहुजा, डॉ. भक्ती मेहरे आणि डॉ. अंकिता खंडेलवाल यांना निलंबित करण्यात आले होते.
