नाशिक (वृत्तसंस्था) इगतपुरी येथे नाशिक ग्रामीण पोलिसांनी रेव्ह पार्टीवर धाड टाकली. इगतपुरीतील एका रिसॉर्टमध्ये ही रेव्ह पार्टी सुरु होती. या छापेमारीत चित्रपटसृष्टीत काम करणाऱ्या चार महिलाही सहभागी झालेल्या होत्या. यात ‘बिग बॉस’मध्ये सहभागी झालेल्या एका महिलेचाही समावेश आहे. रेव्ह पार्टी सुरू असल्याची माहिती मिळाल्यानंतर नाशिक ग्रामीण पोलीस अधीक्षक सचिन पाटील यांच्या निर्देशाप्रमाणे बंगल्यावर धाड टाकण्यात आली.
इगतपुरी याठिकाणी सुरू असलेल्या एका रेव्ह पार्टीचा नाशिक पोलिसांनी पर्दाफाश केला आहे. मुंबई -आग्रा महामार्गावरील मानस रिसॉर्टमधील स्काय ताज व्हिलातील दोन बंगल्यात रेव्ह पार्टीचा धांगडधिंगा सुरू होता. या घटनेची माहिती मिळाल्यानंतर ग्रामीण पोलीस ठाण्याचे अधिक्षक सचिन पाटील यांनी आपल्या पोलीस पथकासह संबंधित ठिकाणी छापा टाकला आहे. यावेळी अनेकजण एकत्र येऊन मद्यधुंद अवस्थेत धांगडधिंगा करताना दिसले आहे. या रेव्ह पार्टीत १० पुरुष आणि १२ महिलांचा समावेश होता. यातील काही पुरुष आणि काही महिला मादक पदार्थांचं सेवन करत बिभत्स अवस्थेत आढळून आल्या आहेत. यातील चार तरुणी या चित्रपट सृष्टीशी संबंधित असल्याची माहितीही समोर आली आहे. यातील काही महिला बॉलिवूडशी संबंधित आहे, तर काही दक्षिणात्य चित्रपटसृष्टीशी संलग्न आहेत. शिवाय एका अभिनेत्रीनं बिग बॉस या ‘रिअॅलिटी शो’ मधील माजी स्पर्धक आहे. यामध्ये एका इराणी महिलेचा देखील समावेश आहे. याप्रकरणी पोलिसांनी छापा टाकल्यानंतर, ट्रायपॉड, कॅमेरा आणि मादक पदार्थ जप्त केले आहेत. सर्व आरोपींना ताब्यात घेतलं असून कोरोना नियमाच्या उल्लंघनासोबत, अवैधरित्या पार्टीचं आयोजन करणे, अशा विविध कलमांतर्गत गुन्हा दाखल करण्यात आला आहे.
या कारवाईविषयी बोलताना पोलीस अधीक्षक सचिन पाटील यांनी माहिती दिली. “इगतपुरीतील दोन बंगल्यांमध्ये अवैध स्वरूपाचं काम सुरू असल्याची माहिती बातमीदारांकडून पोलिसांना मिळाली होती. माहितीच्या आधारावर पोलिसांनी संबंधित बंगल्यावर कारवाई केली. यात १० पुरूष आणि १२ महिला या ड्रग्ज आणि हुक्काचं सेवन करताना आढळून आले. त्यासंदर्भात आता पोलीस पुढील कारवाई करत आहेत. २२ लोकांसह यात सहभागी इतर लोकांवरही कारवाई सुरू करण्यात आली आहे,” अशी माहिती पोलीस अधीक्षक पाटील यांनी दिली.
