चोपडा (प्रतिनिधी) स्थानिक गुन्हे शाखेच्या पोलीस पथकाला मिळालेल्या गुप्त माहितीच्या आधारे, दाखल रोडवरील अकुलखेडा गावाजवळ चोपडा ते शिरपूर मार्गावर दुचाकीवरून येणारे विजय मोरे आणि अविनाश पाटील या दोघांकडून ४ किलो ५०० ग्रॅम वजनाचा ३६ हजार रुपयांचा गांजा जप्त करण्यात आला आहे. पोलिसांनी या दोघांना ताब्यात घेतले आहे.
शिरपूर तालुक्यातील भोरखेडा येथील विजय देवराम मोरे (वय २८) व धरणगाव तालुक्यातील वाघळूद येथील अविनाश भिका पाटील (वय २६) हे दोघे दुचाकीवरून शिरपूरकडून चोपडा शहराकडे येत असताना अकुलखेडा गावाजवळ त्यांना थांबवण्यात आले. यावेळी त्यांच्याजवळ ३६ हजार रुपयांचा ४ किलो ५०० ग्रॅम वजनाचा गांजा पोलिसांनी जप्त केला. या प्रकरणी या दोघांवर चोपडा पोलिसांत गुन्हा दाखल केला आहे. ही कारवाई शहर पोलीस निरीक्षक मधुकर साळवे, सपोनि एकनाथ भिसे, गणेश वाघमारे, अनिल जाधव, विलेश सोनवणे, दीपक माळी, रवींद्र चव्हाण, रवींद्र पाटील, हेमंत पाटील, प्रदीप चावरे, जितेंद्र चव्हाण, गोकुळ सोनवणे, योगेश बोडखे, विनोद पाटील यांनी केली.
