जळगाव (प्रतिनिधी) अंतर्गत सुरक्षा व्यवस्थेचा धोका लक्षात घेता खाजगी वाहनांवर विविध पदांच्या पाट्यां लावण्यावर बंदी आणावी अशी मागणी अॅड.जमील देशपांडे यांच्या नेतृत्वात मनसेच्या पदाधिकाऱ्यांनी उपप्रादेशिक परिवहन अधिकाऱ्यांकडे एका निवेदनाद्वारे केली आहे.
निवेदनात म्हटले आहे की, खाजगी वाहनांच्या समोर दर्शनी दिसेल अशा स्वरूपात “पोलीस”, “न्यायाधिश”, “महाराष्ट्र शासन”, “विज वितरण”, “एलआयसी-भारत सरकारचा उपक्रम”, “कार्यकारी अभियंता” अशा प्रकारच्या विविध शासकीय पद धारण करणाऱ्या व्यक्तींकडून स्वतःव्या वापराच्या वाहनांमध्ये पाट्या लावण्याचा प्रकार मोठया प्रमाणात वाढला आहे. शहर, जिल्हा व संपुर्ण राज्यात अशा पाट्या लावून आम्ही काही वेगळे आहोत. अशा तोऱ्यात अनेक जण स्वतःला मिरवत आहे. या अशा प्रकारामुळे सुरक्षा व्यवस्थेला मोठा घोका उद्भवू शकतो. अशा पाट्या लावून चोर, दरोडेखोर, अतिरेकी व सामाजिक विघातक काम करणाऱ्या व्यक्ती प्रवास करू शक्यता नाकारता येत नाही. अशा पाट्या लावलेली व्यक्ती विशिष्ट पदावर असल्यामुळे वाहतुक पोलीस, महामार्ग पोलीस, परिवहन विभाग दुर्लक्ष करतात.
महाराष्ट्र वाहन कायदा व केंद्रीय वाहन कायद्यामध्ये अशा प्रकारच्या पाट्या लावण्याबबत कोणतीही तरतुद नाही म्हणून अशा वाहनांवर कारवाई करावी व राज्याच्या सुरक्षेच्या दृष्टीकोनातुन परिवहन आयुक्त यांच्याही निदर्शनास आणून द्यावी, असे म्हटले आहे. निवेदन देतांना अॅड.जमील देशपांडे, जिल्हा सचिव मुकुंदा रोटे, तालुका अध्यक्ष,विनोद शिंदे,विद्यार्थी सेना जिल्हाध्यक्ष संदीप मांडोळे,मतीन पटेल, तन्वीर तडवी हे उपस्थित होते.
