पुणे (वृत्तसंस्था) राज्यातील पदवीधर मतदारसंघांच्या निवडणुकीसाठी महाराष्ट्र नवनिर्माण सेनेचे प्रमुख राज ठाकरे प्रचार करणार असल्याची माहिती समोर आली आहे. मनसेकडून पुणे पदवीधर मतदारसंघासाठी रुपाली पाटील-ठोंबरे तर शिक्षक मतदारसंघासाठी विद्याधर मानकर यांना उमेदवारी देण्यात आली आहे.
राज्यातील पदवीधर मतदारसंघांच्या निवडणुकीच्या पार्श्वभूमीवर राज ठाकरे दोन्ही मतदारसंघातील घडामोडींवर स्वत: लक्ष ठेवून असल्याचे समजते. मनसेकडून पुणे पदवीधर मतदारसंघातून उमेदवारी देण्यात आलेल्या रुपाली पाटील-ठोंबरे आक्रमक नेत्या म्हणून प्रसिद्ध आहेत. महिला, युवक-युवतींच्या प्रश्नांवर त्यांचं विशेष काम आहे. स्थानिक विद्यार्थ्यांच्या प्रश्नांवरील आंदोलनात त्यांचा सहभाग राहिला आहे. त्या उच्चशिक्षित असून त्यांचे शिक्षण बी.कॉम LLB झाले आहे. त्या व्हॉलीबॉल आणि शुटिंग व्हॉलीबॉल राष्ट्रीय खेळाडू राहिल्या आहेत. त्यामुळे आता रुपाली पाटील-ठोंबरे पदवीधर मतदारांना साद घालण्यात कितपत यशस्वी ठरणार, हे पाहणे महत्त्वाचे ठरेल. या मतदारसंघात एकूण ६२ उमेदवार रिंगणात आहेत. यावेळी मनसेने पदवीधर निवडणुकीत उडी घेतल्याने मतविभाजनाचा फटका टाळण्याचे आव्हान आहे.
