हैदराबाद (वृत्तसंस्था) आंतरधर्मीय लग्न केल्याच्या रागातून तरुणीच्या कुटुंबातील दोघांनी २५ वर्षीय तरुणाची हत्या केल्याची घटना हैदराबादमध्ये घडली आहे.
मिळालेल्या माहितीनुसार, जानेवारी २०२२ मध्ये शोरूममध्ये काम करणाऱ्या एका हिंदू तरुणाने २३ वर्षीय मुस्लीम तरुणीशी प्रेमविवाह केला होता. मात्र या आंतरधर्मीय लग्नाला तरुणीच्या कुटुंबातील सदस्यांचा विरोध होता. त्यामुळे लग्न झाल्यानंतर तरुणाने पोलिसांकडे सुरक्षा पुरवण्याची मागणीही केली होती. अशातच बुधवारी रात्री सदर तरुण आपल्या पत्नीसोबत मोटारसायकवरून जात असताना तरुणीच्या कुटुंबातील दोघांनी त्यांना रस्त्यात गाठलं आणि धारदार शस्त्रांनी वार करण्यास सुरुवात केली.
पतीवर हल्ला करत असलेल्या कुटुंबियांकडे सदर तरुणीने हल्ला थांबवण्याच्या अनेकदा विनवण्या केल्या. मात्र सूडाने पेटलेल्या कुटुंबातील सदस्याने तिचं ऐकलं नाही आणि तरुणावर वार करणं सुरूच ठेवलं. अखेर गंभीर जखमी झालेल्या तरुणाला रक्ताच्या थारोळ्यात सोडून काही वेळानंतर हल्लेखोरांनी घटनास्थळाहून पळ काढला. मात्र हल्ल्यात मोठा रक्तस्त्राव झाल्याने तरुणाने काही क्षणांनंतर प्राण सोडले. डोळ्यासमोरच कुटुंबियांकडून पतीची हत्या करण्यात आल्याने २३ वर्षीय तरुणीने मोठा आक्रोश केला. दरम्यान, हत्येत सहभागी असणाऱ्या दोन्ही आरोपींना आम्ही अटक केली आहे. तसंच या हत्येच्या कटात कुटुंबातील इतर सदस्यही सहभागी असण्याची शक्यता असून याप्रकरणी पुढील तपास सुरू आहे, अशी माहिती सहाय्यक पोलीस आयुक्त पी. श्रीधर रेड्डी यांनी दिली आहे.
