जळगाव ( प्रतिनिधी ) -: काहीही कारण नसतांना शिवीगाळ करणाऱ्यांना समजविण्यासाठी गेलेल्या विजय सुकलाल जोशी (वय ६५, रा. शिवबानगर, कोल्हे हिल्स) या सेवानिवृत्त पोलीस कर्मचाऱ्यावर चाकूने वार करीत गंभीर जखमी केले. ही घटना दि. १६ जानेवारी रोजी रात्री साडेदहा वाजेच्या सुमारास मेहरुण तलाव परिसरातील पुलाजवळ घडली. याप्रकरणी दोघांविरुद्ध एमआयडीसी पोलीस ठाण्यात गुन्हा दाखल करण्यात आला आहे.
शहरातील कोल्हे हिल्स परिसरातील शिवबा नगरात विजय सुकलाल जोशी हे सेवानिवृत्त पोलीस कर्मचारी वास्तव्यास आहे. दि. १६ जानेवारी रोजी रात्री साडेदहा वाजेच्या सुमारास मेहरुण तलाव परिसरातील पुलाजवळ काही संशयित त्यांना काहीही एक कारण नसतांना शिवीगाळ करीत होते. यावेळी जोशी हे त्यांना समजविण्यासाठी गेले असता, संशयितांनी त्यांच्यासोबत वाद घालीत त्यांच्याजवळ असलेल्या धारदार चाकूने पोटाजवळ वार केले. तसेच लाथाबुक्क्यांनी मारहाण करीत ते पसार झाले. दरम्यान, जोशी यांनी रुग्णालयात उपचार घेतल्यानंतर एमआयडीसी पोलीस ठाण्यात तक्रार दिली. त्यानुसार संशयित अनंत प्रमोद गोंडे व अनिल शंकर लागवणकर (दोघ रा. जोशी कॉलनी) यांच्याविरुद्ध गुन्हा दाखल करण्यात आला आहे. तपास उपनिरीक्षक राजेंद्र उगले हे करीत आहे.
