अमरावती (वृत्तसंस्था) वादग्रस्त वक्तव्यामुळे चर्चेत असणारे शिवप्रतिष्ठान हिंदुस्थानचे संभाजी भिडे यांनी पुन्हा एकदा वादग्रस्त वक्तव्य केले आहे. आता डॉक्टरांबाबत आक्षेपार्ह वक्तव्य केले आहे. डॉक्टर हे लुटारु आहेत, ते मारायच्या लायकीचे असल्याचे त्यांनी म्हटले. अमरावतीत झालेल्या कार्यक्रमात त्यांनी डॉक्टरांवर टीका करताना हे विधान केलं.
वादग्रस्त विधान आणि भूमिकांमुळे सातत्याने चर्चेत असलेले शिवप्रतिष्ठान हिंदुस्थानचे प्रमुख संभाजी भिडे यांनी कोरोनावरून आता डॉक्टरांवर टीका केली आहे. “कोरोना काळात १०५ टक्के लोक भीतीनेच मेले. जितका शिकलेला माणूस तेवढा तो गाढव. डॉक्टर नालायक आहेत. ते लुटारू आहेत. डॉक्टर हरामखोर आहेत. डॉक्टर आपटून मारायच्या लायकीचे आहेत. मरू द्या. त्यांच्याकडे कधीही जाऊ नका,” असं भिडे म्हणाले.
संभाजी भिडेंनी यापूर्वी केलेली विधानं
‘जगाच्या पाठीवर 187 राष्ट्र आहे. या राष्ट्रात आपल्याला गुलामी, दास्याच्या नरकात राहण्याचा विषमपणा वाटत नाही, लाज वाटत नाही.. अशा बेशरम लोकांचा… जगात क्रमांक दोनची लोकसंख्या असलेला आपला देश आहे. एक नंबर लोकसंख्या असलेला देश चीन आहे. 1 अब्ज 23 कोटी लोकांचा देश जगात आहे. प्रदीर्घ काळ परकियांचा मार खात, परकियांचं दास्यत्व करत, परकियांचं खरकटं-उष्टं खात.. स्वाभिमानाची शून्य जाणीव नसलेला निर्लज्ज लोकांचा देश ज्याचं नाव आहे हिंदुस्थान”, असं विधान संभाजी भिडे यांनी यावेळी केलं होतं.
