बीजिंग (वृत्तसंस्था) चीनचे अध्यक्ष शी जिनपिंग शांघाय सहकार्य परिषदेच्या सदस्य देशांच्या प्रमुखांच्या ऑनलाइन परिषदेला उपस्थिती लावतील. कोव्हिड नंतरच्या काळात ‘एससीओ’तील सदस्यांमध्ये परस्परविश्वास, विकासाला चालना, यांना चालना मिळावी, यासाठी ते प्रस्ताव सादर करतील. दहा नोव्हेंबर रोजी होणाऱ्या या ऑनलाइन परिषदेत पंतप्रधान नरेंद्र मोदीही सहभागी होण्याची शक्यता आहे.
पंतप्रधान नरेंद्र मोदी दहा नोव्हेंबर रोजी होणाऱ्या या परिषदेमध्ये सहभागी होण्याची शक्यता आहे. लडाखमधील तणावाच्या पार्श्वभूमीवर दोन्ही नेते उपस्थित असलेली ही पहिलीच आंतरराष्ट्रीय परिषद असेल. मात्र, द्विस्तरावरील कुठलीही शक्यता नसल्याचे युचेंग यांनी सांगितले. ऑनलाइनच्या ऐवजी प्रत्यक्ष भेटी लवकरच सुरू होतील, असा आशावाद युचेंग यांनी व्यक्त केला. लडाखमध्ये एकीकडे तणावाची परिस्थिती निर्माण केल्यानंतर ”एससीओ’मध्ये सदस्य देशांचे हितसंबंध जपले जावेत, एकमेकांना सहकार्य करावे, सदस्य देशांच्या अंतर्गत व्यवहारात अजिबात ढवळाढवळ करू नये,’ असे मुद्दे जिनपिंग परिषदेत मांडणार आहेत. पाकिस्तानला दहशतवादाबाबत काहीही न बोलणारे चीनचे अध्यक्ष दहशतवाद, फुटिरतावाद, धार्मिक अतिरेकीवादावरही सर्वांनी मिळून लढावे, असे आवाहन करणार आहेत.
‘एससीओ’ची ही ऑनलाइन शिखर परिषद रशिया आयोजित करणार आहे. ब्राझील, रशिया, भारत, चीन, दक्षिण आफ्रिका या ‘ब्रिक्स’ समूहाच्या ऑनलाइन परिषदेचेही आयोजन रशियाच करणार आहे. शी जिनपिंग यांच्या एससीओतील उपस्थितीबाबत गुरुवारी विशेष पत्रकार परिषदेचे आयोजन करण्यात आले. चीनचे उपपराष्ट्रमंत्री ली युचेंग यांनी परिषदेबाबत माहिती दिली. ‘एससीओ’तील सदस्य देशांच्या प्रमुखांशी कोव्हिडनंतरच्या काळातील आव्हाने, सुरक्षा, स्थिरता आणि विकास यावर जिनपिंग बोलतील, अशे युचेंग यांनी सांगितले.
