मुंबई (वृत्तसंस्था) मुंबईच्या पश्चिम उपनगरातील जोगेश्वरीतील खासगी रुग्णालयात लस घेतल्यानंतर काही तासांतच ६८ वर्षांच्या ज्येष्ठ नागरिकाचा मृत्यू झाल्याची घटना उघडकीस आली आहे. लस घेतल्यानंतर झालेला मुंबईतील हा पहिला मृत्यू असून पालिकेने याच्या तपासासाठी समिती नियुक्त केली आहे.
८ मार्च या दिवशी मुंबईच्या पश्चिम उपनगरातील जोगेश्वरी येथील मिल्लत नर्सिग होममध्ये एका ६८ वर्षीय ज्येष्ठ नागरिकाला दुपारी साडेतीनच्या सुमारास कोव्हिशिल्ड लशीची पहिली मात्रा देण्यात आली. ही लस दिल्यानंतर काही मिनिटांत ते बेशुद्ध होत खुर्चीतून खाली कोसळले. त्यांना तातडीने रुग्णालयातील अतिदक्षता विभागात दाखल करण्यात आले. उपचार सुरू असतानाच त्यांचा संध्याकाळी पाच वाजण्याच्या सुमारास मृत्यू झाला. मृत्यू पावलेल्या या जेष्ठ नागरिकाला अनेक प्रकारचे आजार होते, अशी माहिती महापालिकेने दिली आहे. त्यांचा मृतदेह शवविच्छेदनासाठी जे. जे. रुग्णालयात पाठवण्यात आला असल्याची माहिती महापालिकेच्या जनसंपर्क विभागाने दिली आहे.
