नवी दिल्ली (वृत्तसंस्था) ज्येष्ठ पत्रकार विनोद दुआ यांचे शनिवारी दीर्घ आजाराने निधन झाले. प्रसिद्ध पत्रकार विनोद दुआ यांनी वयाच्या ६७ व्या वर्षी अखेरचा श्वास घेतला. त्यांना दिल्लीतील रुग्णालयातील अतिदक्षता विभागात दाखल करण्यात आले होते. विनोद दुआ यांची मुलगी मल्लिका दुआ हिने इन्स्टाग्राम पोस्टद्वारे याबाबत माहिती दिली आहे.
५ डिसेंबर रोजी विनोद दुआ यांच्या पार्थिवावर अंत्यसंस्कार करण्यात येणार आहेत. मल्लिका दुआ यांनी सोशल मीडिया पोस्टवर लिहिले की, बेधडक, निडर आणि असाधारण वडील विनोद दुआ यांचे निधन झाले. दिल्लीच्या निर्वासित वसाहतीतून पत्रकारितेच्या शिखरावर पोहोचणारे ते अनोखे जीवन जगले. ते नेहमी सत्य सांगत राहिले.
विनोद दुवा यांनी जवळपास ४२ वर्षाहून पत्रकारिता क्षेत्रात काम केले आहे. सर्वसामान्यांना समजणाऱ्या भाषेत निवडणुकांचे विश्लेषण करण्यास विनोद दुवा सुरुवात केली. त्यानंतर हिंदी आणि इतर भाषांमध्ये हा ट्रेन्ड सुरु झाला. १९९६ मध्ये त्यांना रामनाथ गोएंका पुरस्काराने सन्मानित करण्यात आले होते. तसेच, भारत सरकारने २००८ मध्ये त्यांना पत्रकारितेसाठी पद्मश्री पुरस्काराने सन्मानित केले होते. जून २०१७ मध्ये पत्रकारितेच्या क्षेत्रातील त्यांच्या कामगिरीबद्दल त्यांना मुंबई प्रेस क्लबतर्फे रेडइंक पुरस्काराने सन्मानित करण्यात आले.
