वरणगाव (प्रतिनिधी) वेल्हाळे गावालगतच्या स्मशान भुमीत गावातील दोन महिला व एक पुरुष स्मशानभूमीत पती-पत्नी व एक महिला मांत्रिकाला नग्नावस्थेत प्रेताजवळ हवन करताना नागरिकांनी बघितल्याची माहीती ग्रामस्थांना मिळताच ग्रामस्थांनी स्मशानभूमीकडे धाव घेतली. मात्र, याची कुणकुण लागताच अघोरी कृत्य करणारे जोडपे आणि मांत्रिक महिलेने घटनास्थळावरून धूम ठोकली.
भुसावळ तालुक्यातील वेल्हाळे येथे रविवारी दि. २० रोजी स्व.शांताबाई आत्माराम पाटील (वय ९२ वर्ष) यांचे निधन झाल्याने त्यांच्यावर गावालगतच्या स्मशानभूमित सांयकाळी पाच वाजेच्या सुमारास अंत्यविधी पार पडला. तर रात्री ८.३० वाजच्या दरम्यान गावातील काही शेतकरी शेती पिकाची पाहणी करण्यासाठी जात असताना त्यांनी गावातीलच एक पती-पत्नी व एक महिला मांत्रिकाला नग्नावस्थेत प्रेताजवळ हवन करताना पाहिले. सदर स्मशानातील अघोरी कृत्याचा प्रकार पाहून शेतकऱ्यांनी गावाच्या दिशेने धाव घेतली व गावातील नागरिकांना याची कल्पना दिली.
त्यामुळे या अघोरी कृत्याची शहानिशा करण्यासाठी गावातील नागरिकांनी स्मशानभूमी कडे धाव घेतली. याची चाहुल तिघांना लागताच त्यांनी घटनास्थळावरून धूम ठोकली. तर या घटनेमुळे गावकरी व लहान मुलांमध्ये भितीचे वातावरण निर्माण झालेय तर मांत्रिक कशासाठी हवन करत होते ? याबद्दल परीसरात उलट सुलट चर्चेला उधाण आले आहे. याबाबतचे वृत्त आज एका दैनिकाने दिले आहे.
