मुंबई (वृत्तसंस्था) राष्ट्रवादीचे अध्यक्ष शरद पवार यांना पोटाचा त्रास होत असल्यामुळे मुंबईतील ब्रीच कँडी हॉस्पिटलमध्ये पुन्हा एकदा दाखल करण्यात आले आहे. उद्या सोमवारी आणखी एक शस्त्रक्रिया पार पडणार आहे. त्याबाबत अल्पसंख्याकमंत्री नवाब मलिक यांनी ट्विट करुन माहिती दिली आहे.
राष्ट्रवादी काँग्रेसचे राष्ट्रीय अध्यक्ष आणि खासदार शरद पवार साहेबांना ब्रीच कँडी हॉस्पिटलमध्ये आज दाखल करण्यात आले असल्याची माहिती राष्ट्रवादी काँग्रेसचे राष्ट्रीय प्रवक्ते आणि अल्पसंख्याक मंत्री नवाब मलिक यांनी दिली. पवारांना ७ दिवस विश्रांतीचा सल्ला देण्यात आला होता. त्यानंतर १५ दिवसानी त्यांच्या पित्ताशयावर शस्त्रक्रिया केली जाणार होती. त्यानुसार आज दाखल करण्यात आले असून उद्या पित्ताशयावर शस्त्रक्रिया केली जाणार आहे असेही नवाब मलिक यांनी सांगितले.
मागील काही दिवसांपासून शरद पवार यांना प्रकृती विषयक समस्या जाणवत आहेत. त्यांना यापूर्वी अचानक पोटदुखीचा त्रास सुरु झाला होता. याच कारणामुळे त्यांना ३० मार्च रोजी ब्रीच कँडीत दाखल करण्यात आले होते. त्यानंतर त्यांच्यावर शस्त्रक्रिया करून पित्ताशयातून खडा काढण्यात आला होता. शस्त्रक्रियेनंतर त्यांना डॉक्टरांच्या निगराणीखाली ठेवण्यात आले होते. यशस्वी शस्त्रक्रिया केल्यानंतर ३ एप्रिलला त्यांना डिस्चार्ज देण्यात आला होता.
