देहरादून (वृत्तसंस्था) दिल्लीहून देहरादूनला जाणाऱ्या दिल्ली-देहरादून शताब्दी एक्सप्रेसच्या बोगीला आग लागली. ही ट्रेन रायवाला ते देहरादून जात असताना कांसरो स्थानकाजवळ ही घटना घडली. आग लागल्याचं समजताच लोको पायलट आणि गार्ड यांनी प्रसंगावधान दाखवत ट्रेन कांसरो रेल्वे स्थानकात थांबवली. यानंतर राजाजी टायगर रिझर्व्ह आणि रेल्वेच्या अधिकाऱ्यांना घटनेची माहिती देण्यात आली. या घटनेत अद्याप कोणतीही जीवितहानी झाली नाही.
मिळालेल्या माहितीनुसार ही आग शॉर्टसर्किटमुळे लागली. या घटनेनंतर रेल्वेमध्ये गोंधळ उडाला. घटनास्थळावर कांसरो रेंजमधील रेंजर व त्यांच्या कर्मचाऱ्यांनी तातडीने घटनास्थळी जाऊन बचावकार्य सुरू केले. ज्वालांनी वेढलेली बोगी मुख्य रेल्वेपासून वेगळी करण्यात आली. या आगीत शताब्दी एक्स्प्रेसचं C4 compartment जळून खाक झालं आहे. दरम्यान, सर्व प्रवाशांना सुखरुप बाहेर काढण्यात आले असल्याची माहिती उत्तराखंडचे डीजीपी अशोक कुमार यांनी दिली आहे.
शताब्दी एक्स्प्रेसचा कोच क्रमांक १९९४०० मध्ये दुपारी १२.२० च्या सुमारास हरिद्वार-देहरादून परिरासत आग लागली होती. इंजिनापासून ८व्या क्रमांकाच्या डब्यात ही आग लागली होती. ही आग विझवण्यासाठी अग्निशमन दलाला पाचारण करण्यात आले असून अग्निशमन दलाच्या जवानांनी या आगीवर नियंत्रण मिळवले आहे.
