मुंबई (वृत्तसंस्था) मुकेश अंबानी यांच्या घरासमोर स्फोटकांनी भरलेली स्कॉर्पिओ कार आढळल्याच्या प्रकरणाला आता वेगळे वळण लागले आहे. एनआयएने सहाय्यक पोलीस निरीक्षक सचिन वाझे यांनाच या प्रकरणात अटक केली. यानंतर आता स्कॉर्पिओ कारबरोबर दिसलेली इनोव्हा कारही सापडली आहे. महत्त्वाचं म्हणजे ही कार मुंबई पोलिसांचीच असल्याचं समोर आलं आहे.
मुकेश अंबानी प्रकरणाला रविवारी वेगळेच वळण मिळालं. या प्रकरणात राष्ट्रीय तपास यंत्रणे(NIA)च्या पथकाच्या हाती मोठे यश आले आहे. एनआयएच्या पथकाने अँटीलियाबाहेर दिसलेल्या इनोव्हा गाडीला शनिवारी रात्री शोधले आहे. क्राइम ब्रांचमध्ये असताना सहायक पोलिस निरीक्षक सचिन वाझे आणि त्यांचे सहकारी हीच कार वापरत होते.
उद्योगपती मुकेश अंबानी यांच्या घराजवळ गुरुवारी (२५ फेब्रवारी) मध्यरात्री दोनच्या सुमारास अज्ञात व्यक्तींनी स्कॉर्पिओ कार बेवारस अवस्थेत सोडली होती. या कारमध्ये सुमारे अडीच किलो वजनाच्या जिलेटीनच्या कांड्या आढळून आल्यानं सगळ्यांनाच धक्का बसला होता. ‘मुंबई इंडियन्स’ लिहिलेल्या बॅगेत अंबानी कुटुंबीयांना धमकी देणारी चिठ्ठीही सापडली. या संपूर्ण प्रकरणात स्कॉर्पिओसह इनोव्हा कार सहभागी होती. यापैकी स्कॉर्पियो कार १७ फेब्रुवारीच्या रात्री मुलुंड उड्डाणपुलाजवळून (ऐरोलीकडे जाणाऱ्या मार्गावरील) चोरण्यात आली. तर इनोव्हा कारवरील नोंदणी क्रमांक बनावट असल्याचे स्पष्ट झाले होतं. दरम्यान ही इनोव्हा कार सापडली असून, शनिवारी रात्री एनआयएच्या कार्यालयात आणण्यात आली.
स्कॉर्पिओ गाडीबरोबर एक इनोव्हा कार होती. ज्यातून स्कॉर्पिओ गाडीचा चालक फरार झाला होता. मुंबईतील मुलुंड टोल नाक्यावर या गाडीत दोन व्यक्ती दिसून आले होते. स्कॉर्पिओ गाडीचे मालक मनसुख हिरेन असल्याचं समोर आलं होतं. तर इनोव्हा कारच्या मालकाचा शोध घेतला जात होता. मात्र, आता ही कार सापडली असून, मुंबई पोलीस गुन्हे शाखेचीच ही गाडी असल्याचं समोर आलं आहे. तपास सुरू केल्यानंतर पोलिसांकडून पांढऱ्या इनोव्हाबद्दल माहिती काढण्याचं काम हाती घेण्यात आलं होतं. इनोव्हाचा शोध घेण्यासाठी पोलिसांनी ८०० सीसीटीव्ही कॅमेऱ्यांचे फुटेज तपासले आहे. त्याचबरोबर ३० पेक्षा अधिक लोकांचे जबाब नोंदवले होते. तरीही पांढऱ्या इनोव्हाबद्दल कोणतीही माहिती मिळाली नव्हती.
सचिन वाझेंचा अजून एक व्हिडिओ व्हायरल
वादाच्या भोवऱ्यात सापडलेले पोलिस निरीक्षक सचिन वाझे यांचा अजून एक व्हिडिओ सोशल मीडियावर व्हायरल होत आहे. या व्हिडिओमध्ये ते एका स्कॉर्पियो कारजवळ दिसत आहेत. ही कार हूबेहूब अँटिलियाच्या बाहेर स्फोटकांनी भरलेल्या कार सारखी आहे. महाराष्ट्र ATS आता या व्हायरल व्हिडिओचा तपास करत आहे.
सूत्रांनी दिलेल्या माहितीनुसार, हा व्हिडिओ गेल्या वर्षी 5 नोव्हेंबरचा आहे, जेव्हा वाझे हे पोलिस पथकासह पत्रकार अर्णब गोस्वामीला अटक करत होते. यावेळी, रिपब्लिक टीव्हीच्या टीमने त्यांचा पाठलाग केला, त्यानंतर त्यांनी ताफा थांबवला. त्यावेळी तीच संशयास्पद कार त्याच्या जवळ उभी असल्याचे दिसून येत आहे.
