धरणगाव (प्रतिनिधी) आज गणेश चतुर्थीच्या मुहूर्तावर धरणगावच्या श्रीजी जिंनिंगमध्ये कापूस खरेदीला प्रारंभ झाला. यावेळी पाणी पुरवठा मंत्री गुलाबराव पाटील, गुलाबराव वाघ आणि सुरेशनाना चौधरी एकत्र आल्यामुळे गावात एकच चर्चा सुरु झाली आहे. तर यावेळी राजकीय आखाड्यात जो, तो आपापली कुस्ती खेळत असतो. पण व्यक्तिगत संबंध खराब करणारा मी माणूस नाही, अशा शब्दात पाणी पुरवठा मंत्री गुलाबराव पाटील यांनी आपल्या भावना व्यक्त केल्या आहेत.
श्री जिनिंग मध्ये आज गणेश चतुर्थीच्या मुहर्तवर कापूस खरेदीला प्रारंभ झाला. मुहर्तचा भाव ११ हजार १५३ रुपये श्री जिनिंग मध्ये प्रति क्विंटल भाव देण्यात आला. दरवर्षी प्रमाणे धरणगाव तालुक्यातील जीनिंग उद्योगात गणेश चतुर्थीच्या मुहार्तवर कापूस खरेदीला सुरुवात करण्यात आली. दरवर्षी या कार्यक्रमाला ना.गुलाबराव पाटील यांची उपस्थिती असते. परंतू राजकीय वातावरण गढूळ झाल्यानंतर ते या कार्यक्रमाला येतील का?, याबाबत शंका होती. कारण या जिनिंगचे संचालक तथा प्रमुख माजी नगराध्यक्ष सुरेशनाना चौधरी हे आहेत. तर श्री. चौधरी आणि ना. पाटील यांच्यात सध्या राजकीय अबोला आहे. शिवसेनेचे सहसंपर्क प्रमुख गुलाबराव वाघ यांच्यासोबत सुरेशनाना चौधरी हे शिवसेनेतच थांबले आहेत. त्यामुळे शिंदे गटासोबत मागील काही दिवसापासून त्यांचा राजकीय संघर्ष सुरु आहे.
परंतू यावेळी मंत्री गुलाबराव पाटील यांनी राजकीय आखाड्यात जो, तो आपापली कुस्ती खेळत असतो. पण व्यक्तिगत संबंध खराब करणारा मी माणूस नाही. तसेच आम्ही कोणत्या एकमेकाला गोळ्या मारल्या आहेत, अशा शब्दात आपल्या भावना व्यक्त केल्या. दरम्यान, आजच्या कार्यक्रमामुळे शिवसेना आणि शिंदे गटातील तणावाचे वातावरण सध्या तरी हलके झाले आहे. यावेळी माजी नगराध्यक्ष पी.एम. पाटील, राजू महाजन, नयन शेठ गुजराथी, जीवनसिंह बयस, माजी नगराध्यक्ष सुरेशनाना चौधरी, सागर कर्वा, प्रवेश गुजराथी, निखिल बयस, नीलेश चौधरी यांच्यासह आदी पदाधिकारी आणि कार्यकर्ते उपस्थित होते.
