जळगाव (प्रतिनिधी) एकीकडे मुख्यमंत्री एकनाथ शिंदेंचा बंडखोर गट शिवसेनाच नव्हे तर चिन्ह देखील आमचेच असल्याचा दावा करतोय. तर दुसरीकडे मात्र, मुक्ताईनगरचे अपक्ष आमदार चंद्रकांत पाटील यांनी शिवसेना ही आमचीच, उद्धव ठाकरे हे पक्षप्रमुख आहेत. आम्ही शिवसेनेपासून वेगळे झालो नाही, शिवसेनेतच आहोत, असं वक्तव्य केल्यामुळे अनेकांच्या भुवया उंचावल्या आहेत.
उद्धव ठाकरे आणि शिवसेनेतून फुटलेला एकनाथ शिंदे यांचा गट आपलीच खरी शिवसेना असल्याचे दावे करत आहेत. अगदी शिंदे गटातील आमदार गुलाबराव पाटील ह्यांनी विधिमंडळात बहुमत असल्याने खरी शिवसेना आमचीच असल्याचा दावा केला होता. एवढेच नव्हे तर, धनुष्यबाण चिन्हासाठी पुढील लढाई न्यायालयात असेल, असेही गुलाबराव पाटील यांनी म्हटले होते. परंतू शिंदे यांच्याच गटातील बंडखोर आमदार चंद्रकांत पाटील यांनी मात्र वेगळीच प्रतिक्रिया दिली आहे. शिवसेना आमचीच आहे. उद्धव साहेबांचीच शिवसेना आहे, बाळासाहेबांचीच शिवसेना आहे. फक्त आमच्यात जो असंतोष होता घटक पक्षांबाबत तो आम्ही स्पष्ट केलेला आहे. धनुष्यबाणाच्या चिन्हाची लढाई, तर वरिष्ठ स्तरावर जो निर्णय होईल, तो आम्हाला मान्य असेल, असं वक्तव्य चंद्रकांत पाटील यांनी केलं आहे.
