अमळनेर (प्रतिनिधी) दारू पिऊन पत्नीच्या डोक्यात कुऱ्हाड मारून तिचा खून करणाऱ्या शेवरे बुद्रुक (ता. चोपडा) येथील आरोपीला जिल्हा सत्र न्यायालयाने जन्मठेपेची शिक्षा सुनावली. नारायण केऱ्या भिलाला (वय ४०) असे शिक्षा सुनावण्यात आलेल्या आरोपीचे नाव आहे.
नेमकी काय आहे घटना
या संदर्भात अधिक असे की, शेवरे बुद्रुक येथील नारायण केऱ्या भिलाला (वय ४०) व पत्नी गणुबाई नारायण भिलाला (वय ३५) २८ मार्च २०२१ ला रात्री घरात झोपले होते. त्यांची मुले बाहेर झोपली होती. रात्री दारूच्या नशेतच पती-पत्नीचे भांडण झाले. २९ मार्च २०२१ ला सकाळी सहाच्या सुमारास मोठा मुलगा नीलेश पाणी प्यायला उठला असता, त्याला त्याची आई खाटेवर झोपलेली दिसली आणि तिच्या नाका-तोंडातून रक्त वाहत होते. तिचा जोरजोरात श्वास सुरू होता. तिच्या डोक्यावरही जखम झाली होती. नीलेशने आईला विचारण्याचा प्रयत्न केला असता, ती काहीच बोलली नाही. वडिलांना याबाबत विचारले असता, त्यांनी उलटी कुऱ्हाड मारल्याची कबुली दिली. त्यानंतर नशिराबाद येथे गोदावरी रुग्णालयात नेत असताना, गणूबाईचा मृत्यू झाला होता.
दहा साक्षीदार तपासले
यानंतर मुलगा नीलेश याने फिर्याद दिल्यावरून अडावद पोलिस ठाण्यात नारायणविरुद्ध खुनाचा गुन्हा दाखल झाला होता. सहायक पोलिस निरीक्षक दांडगे यांनी तपास केला. सरकारी वकील ॲड. किशोर बागूल यांनी दहा साक्षीदार तपासले. त्यात आरोपीचा मुलगा नीलेश, भाऊ, पुतण्या आणि डॉ. प्राची सुरतवाला, डॉ. वैभव सोनवणे यांची साक्ष ग्राह्य धरून जिल्हा सत्र न्यायाधीश पी. आर. चौधरी यांनी आरोपी नारायण याला जन्मठेपेची शिक्षा सुनावली. आरोपी गरीब असल्याने त्याला न्यायालयाने दंडाची शिक्षा नाकारली. पैरवी अधिकारी म्हणून हिरालाल पाटील व अशोक साळुंखे यांनी काम पाहिले.
