साकळी ता.यावल (प्रतिनिधी) यावल फैजपुर रोडवरील चितोडे गावाच्या अर्धा किलोमीटर अंतरावर असलेल्या कठोरा गावाकडे जाणाऱ्या डोंगर कठोरा फाट्यापासून संपूर्ण रस्ता नवीन बांधकाम करण्याची मागणी शिवस्मारक युवा संघर्ष समिती आणि ग्रामस्थांतर्फे आमदार शिरीष चौधरी यांना केली आहे.
डोंगर कठोरा फाटा हा रस्ता डोंगर कठोरा गावापर्यंत अतिशय खराब झाला असून या रस्त्यावर दुचाकी किंवा चारचाकी चालवणे खुपच कठीण झाले आहे. त्यामुळे अपघातही होण्याची दाट शक्यता आहे. डोंगर कठोरा गावालगतच डोंगरदे हे तिर्थक्षेत्र प्रसिद्ध असून, महिला महाविद्यालय, जिनिंग मिल तसेच शेती वाहतुकीसाठी अनेक वाहनांची सतत वर्दळ सुरु असते. हा रस्ता अतिशय खराब झालेला असल्यामुळे नवीन करण्यात यावा अशी मागणी शिवस्मारक युवा संघर्ष समितीचे जिल्हाध्यक्ष जितेंद्र रवींद्र सरोदे तसेच ग्रामस्थ यांनी आमदार शिरीषदादा चौधरी यांना लेखी निवेदन देऊन केली आहे.
