नवी दिल्ली (वृत्तसंस्था) नवी दिल्लीमधील शास्त्री पार्क परिसरामध्ये आज पहाटेच्या सुमारास मच्छरांसाठी लावलेल्या कॉइलमुळे लागलेल्या आगीत एकाच कुटुंबातील 6 जणांचा आगीत होरपळून मृत्यू झाला आहे. मरण पावलेल्यांमध्ये 4 पुरुष, एक वयस्कर महिला आणि एका दीड वर्षांच्या मुलाचा समावेश आहे. हे सर्वजण एकाच कुटुंबाचे सदस्य आहेत. (6 Killed In Delhi Due to Mosquito Coil)
या संदर्भात अधिक असे की, मच्छर पळवण्यासाठी जाळलेली कॉइल घरातील गादीवर पडल्याने आग लागली. अवघ्या काही वेळात ही आग वाढली आणि घरात मोठ्या प्रमाणात धूर झाला. घराचं दार फारच छोटं असल्यामुळे घरातून बाहेर पळण्यास कुटुंबातील अनेकांना अपयश आलं. त्यामुळेच गुदमरुन आणि आगीत 6 जणांचा होरपळून मृत्यू झाला. उपाचारांसाठी दाखल करण्यात आलेल्यांमध्ये एक अल्पवयीन मुलगा असून त्याचं वय 15 वर्ष इतकं आहे. तर दुसऱ्या व्यक्तीचं वय 45 वर्षांच्या आसपास असल्याचं पोलिसांनी सांगितलं. अन्य एका 22 वर्षीय जखमी तरुणाला प्रथमोपचारानंतर रुग्णालयातून डिस्चार्ज देण्यात आला आहे.
