गुंटूर (वृत्तसंस्था) आठ महिन्यांत तब्बल ८० हून अधिक पुरुषांनी एका १३ वर्षाच्या मुलीवर सामूहिक बलात्कार केल्याची धक्कादायक घटना घडली आहे. गुंटूरमधल्या पोलिसांनी मंगळवारी पिडीत मुलीची सुटका करत १० जणांना अटक केली आहे.
तेलंगणामधल्या एका १३ वर्षीय मुलीला आठ महिन्यांहून अधिक काळापासून बळजबरीने वेश्याव्यवसायात ढकलण्यात आलं होतं. या काळात तिच्यावर ८० हून अधिक पुरुषांनी बलात्कार केला आहे. दरम्यान, या मुलीला सवर्णा कुमारी नावाच्या एका महिलेने दत्तक घेतलं होतं. जून २०२१ मध्ये या मुलीची आई कोरोनामुळे रुग्णालयात दाखल होती. तिथेच सवर्णा कुमारीशी तिची मैत्री झाली. त्यानंतर या मुलीच्या आईचा रुग्णालयातच मृत्यू झाला आणि मुलीच्या वडिलांना काहीही कल्पना न देता सवर्णा कुमारी या मुलीला घेऊन गेली होती. ऑगस्ट २०२१ मध्ये या मुलीच्या वडिलांनी पोलिसात तक्रार दाखल केली. त्यानंतर या वर्षी जानेवारीमध्ये या प्रकरणात पहिली अटक झाली होती. त्यानंतर १९ एप्रिल रोजी गुंटूर पश्चिमच्या पोलिसांनी आणखी १० जणांना अटक केली. तसेच पोलिसांनी या १३ वर्षीय मुलीची सुटकाही केली आहे.
