नांदेड (वृत्तसंस्था) नांदेडमध्ये आठ महिन्यांच्या गर्भवती महिलेने सासरच्या जाचाला कंटाळून आत्महत्या (Suicide) केल्याची धक्कादायक घटना मुखेड शहरातील विठ्ठलनगर येथे घडली आहे. गितांजली ताटे असं आत्महत्या केलेल्या विवाहितेचे नाव आहे.
२०२० मध्ये मुदखेडच्या मेंढला येथील गितांजलीचं लग्न मुखेडच्या अविनाश ताटे याच्यासोबत झालं होतं. लग्नानंतर काही दिवसातचं गितांजलीचा पती अविनाश, दीर आणि सासू यांनी मोबाईलचं दुकान टाकण्यासाठी माहेरकडून पैसे आणण्यासाठी तिचा छळ करत होते.
या सासरच्या जाचाला कंटाळून गितांजलीनं गळफास घेऊन आत्महत्या केली आहे. गितांजलीला शिकून नोकरी करायची होती. तिने आठ दिवसांपुर्वीच बी.ए. द्वितीय वर्षात प्रवेशही घेतला होता. मात्र, तिचे हे स्वप्न अर्धवटच राहीले. दरम्यान गितांजलीच्या आत्महत्या प्रकरणी मुखेड पोलिस ठाण्यात गुन्हा दाखल करण्यात आला आहे. पोलिसांनी पतीसह तिघांना अटक करुन न्यायालयासमोर हजर केले असता न्यायालयाने तिघांना तीन दिवसांची पोलीस कोठडी सुनावली आहे.
