नवी दिल्ली (वृत्तसंस्था) आपल्याला पोलिसांकडून सुरक्षा पुरविण्यात यावी, या हेतूने कुपवाडा येथे दहशतवादी हल्ला झाल्याचा बनाव करणाऱ्या भाजपच्या दोन पदाधिकाऱ्यांना व त्यांच्या सहकाऱ्यांना पोलिसांनी अटक केली आहे. जम्मू काश्मीर पोलिसांनी ही कारवाई केली आहे.
मिळालेल्या माहितीनुसार, इश्फाक अहमद मीर असे अटक करण्यात आलेल्या दोघांपैकी एकाचे नाव आहे. तो कुपवारा येथील भाजपच्या आयटी सेलचा प्रमुख आहे. पक्षाचे जिल्हा प्रवक्ते बशरत अहमद आणि आपल्या खासगी सुरक्षा रक्षकांच्या मदतीने त्यांने दहशतवादी हल्ला झाल्याचा बनाव केला. या घटनेची चौकशी पूर्ण होईपर्यंत भाजपचे कुपवाडा जिल्हाध्यक्ष मोहम्मद शाफी मीर यांना पदावरुन हटवण्यात आल्याचे सांगितले आहे.
एका वरिष्ठ अधिकाऱ्याने दिलेल्या माहितीनुसार, या प्रकरणाची संपूर्ण माहिती आम्हाला एक दोन दिवसांमध्ये मिळेल, असा विश्वास त्यांनी व्यक्त केला. इश्फाकवर १६ जुलैला हल्ला झाल्याचे सांगण्यात आले होते. गुलगाम गावामध्ये मदत साहित वाटत असताना हल्ला झाल्याचे सांगण्यात आले. या हल्ल्यामध्ये माझ्या हाताला गोळी लागल्याने मी जखमी झाल्याचेही इश्फाकने सांगितले होते. मात्र, त्यानंतर पोलिसांनी चौकशी केली आणि हा दहशतवादी हल्ला नसल्याचे समोर आले.
दहशतवाद्यांशी लढताना इश्फाकच्या सुरक्षा रक्षकाकडे असलेल्या बंदुकीमधून चूकून सुटलेल्या गोळीमुळे तो जखमी झाल्याचे सांगण्यात आले होते. मात्र, पोलिसांनी चौकशी केल्यानंतर इश्फाक, बशरत आणि त्यांच्या सुरक्षा रक्षकांनी बनाव करत ही घटना घडल्याची खोटी कहाणी रचल्याचे समोर आले. सोमवारी या प्रकरणामध्ये आरोपी असणाऱ्या दोन सुरक्षा रक्षांसहीत दोन्ही भाजप पदाधिकाऱ्यांना न्यायालयासमोर हजर केले असता न्यायालयाने त्यांना सात दिवसांची पोलिस कोठडी सुनावली आहे.
