जामनेर (प्रतिनिधी) महिलेसोबतचा अश्लील व्हिडिओ व्हायरल करण्याची धमकी देत, अनेकांकडून तालुक्यात पैसे उकळण्यात आले आहेत. दरम्यान, सोशल मीडिया वापरताना सावधगिरी बाळगण्याचे पोलिसांनी आवाहन केले आहे.
असा घातला जातोय गंडा
संशयितांकडून मोबाईलवर लिंक पाठवून किंवा सोशल मीडियावर फ्रेंड रिक्वेस्ट पाठवून गंडा घातला जातो. ही लिंक ओपन करताच किंवा फ्रेंड रिक्वेस्ट अॅक्सेप्ट करताच समोरील महिला संबंधितांशी संपर्क साधून मोबाईल क्रमांक घेते. त्यानंतर काही दिवस चॅट केल्यानंतर लाईव्ह व्हिडिओच्या माध्यमातून जाळ्यात अडकवले जाते. व्हिडिओ कॉल स्वीकारलेल्या व्यक्तीचा चेहरा रेकॉर्डिंग करून, एखाद्या महिलेसोबत अश्लील चाळे करतानाचा बनावट व्हिडिओ तयार केला जातो. हा व्हिडिओ संबंधित व्यक्तीला पाठवला जातो. तसेच व्हिडिओ व्हायरल करण्याची धमकी देऊन पैशांची मागणी केली जाते. त्यासाठी ऑनलाइन अकाऊंट नंबरही दिला जातो. तालुक्यात अशाप्रकारे अनेकांना गंडा घालण्यात आला आहे. बदनामीच्या भीतीने अद्याप याबाबत तक्रार आलेली नाही. अशा प्रकारे कुणी धमकावल्यास नागरिकांनी पोलिसांना माहिती कळवावी, त्यामुळे संशयितांपर्यंत पोलिसांना पोहोचता येईल.
अनोळखी रिक्वेस्ट स्वीकारू नका
सोशल मीडियावर अनेक लिंक बनावट असतात. आलेली फ्रेंड रिक्वेस्ट ओळखीच्या व्यक्तीची असल्याची खात्री करावी. ई-मेल, मोबाईल नंबरच्या माध्यमातून तपासून पाहावे. खात्री केल्याशिवाय कुठलीही लिंक ओपन करू नये, किंवा फ्रेंड रिक्वेस्ट स्विकारू नये, जामनेर पोलीस निरीक्षक किरण शिंदे यांनी सांगितले आहे.
