जळगाव (प्रतिनिधी) शहरातील एका केबल नेटवर्कच्या माध्यमातून पाकिस्तानी चॅनलचे जळगावात प्रसारण होत असून काही कार्यक्रमात भारता विषयी आक्षेपार्ह चर्चा करण्यात आल्याचा खळबळजनक आरोप सामाजिक तथा माहिती अधिकार कार्यकर्ता दीपककुमार गुप्ता यांनी केला आहे. याबाबत गुप्ता यांनी स्थानिक प्रशासनापासून पंतप्रधान कार्यालयापर्यंत तक्रारी केल्या आहेत. विशेष म्हणजे हे केबल नेटवर्क भाजप खासदार रक्षाताई खडसे यांचे असल्याचाही गंभीर आरोप गुप्ता यांनी केला आहे.
जळगाव शहरात दोन मोठ्या स्वरुपाचे केबल नेटवर्क सुरु आहेत. यातील जीके हे केबल नेटवर्क खा. रक्षाताई खडसे यांच्या अधिपत्याखाली सुरु असल्याचा आरोप दीपककुमार गुप्ता यांनी आपल्या तक्रारीत केला आहे. हजारोच्या संख्येत ग्राहक असलेल्या केबल नेटवर्कच्या माध्यमातून पाकिस्तानी कार्यक्रम सुरु असल्याची गोपनीय माहिती सामाजीक तथा माहिती अधिकार कार्यकर्ता दीपककुमार गुप्ता यांना समजली. या माहितीची खात्री करण्यासाठी गुप्ता यांनी त्या कार्यक्रमांचे स्क्रिन शॉटस मिळवून घेतले.
गुप्ता यांना मिळालेल्या माहितीनुसार केटीएन न्यूज, केटीएन संगीत, केटीएन कशिष, सिंध टीव्ही, सिंध न्यूज असे हे प्रमुख पाकिस्तानी चॅनलचे प्रसारण जळगाव बिनधास्त सुरु होते. तसेच त्यातील काही कार्यक्रमात भारता विषयी आक्षेपार्ह चर्चा तसेच वक्तव्य करण्यात आल्याची माहिती देखील आपल्याला मिळाली असल्याचेही गुप्ता यांनी तक्रारीत म्हटले आहे. दरम्यान, गुप्ता यांच्या तक्रारीनंतर संबधित केबल नेटवर्कने पाकिस्तानी चॅनलचे प्रसारण बंद केल्याचे कळतेय. तर प्रशासन आता नेमकी काय कारवाई करते, याकडे सर्वांचे लक्ष लागून आहे.
