रावेर (प्रतिनिधी) अवैध वाळू वाहतुकीविरोधात कारवाईच्या रागातून एकाने परिविक्षाधीन तहसीलदारावर जेसीबी घालण्याचा प्रयत्न तर मंडळ अधिकाऱ्याला चालत्या ट्रॅक्टरवरून ढकलून दिल्याची धक्कादायक घटना रावेर तालुक्यात रविवारी रात्री घडली. याप्रकरणी नऊ जणांविरोधात गुन्हा दाखल करण्यात आला आहे.
रावेर तालुक्यातील पातोंडी शिवारातील भोकर नदीतून वाळूची अवैध वाहतूक होत असल्याची गोपनीय माहिती महसूल विभागाला मिळाली होती. त्यानुसार परिविक्षाधीन तहसीलदार मयूर कळसे, मंडळ अधिकारी विठोबा पाटील, जी.एन. शेळकर यासीन तडवी यांचे पथक कारवाई करण्यासाठी घटनास्थळी गेले.
घटनास्थळी वाळू भरणारे जेसीबी (क्र. एम.एच.१९ डी.व्ही. ३७३९) व स्वराज कंपनीचे निळ्या रंगाचे ट्रॅक्टर (क्र.एम.एच. ११, इ. ए. १३११) व दुसरे विना क्रमांकाचे ट्रॅक्टर आढळून आले. कळसे यांनी सर्व वाहने तहसील कार्यालयात जमा करण्याच्या सूचना वाळू वाहतूक करणाऱ्यांना दिल्या. त्यानंतर त्याठिकाणी दहा मिनिटांनी आलेला संशयित आरोपी मोहन बोरसे याने जेसीबी चालू करून कळसे यांच्या अंगावर नेण्याचा प्रयत्न केला. परंतू वेळीच प्रसंगावधान राखल्याने कळसे थोडक्यात बचावले. या संधीचा फायदा घेत मोहनने जेसीबी पळवून नेले. तसेच एकाने विना क्रमांकाचे ट्रॅक्टर पळवून नेले.
दुसरे ट्रॅक्टर तहसील कार्यालयात जमा करण्यासाठी आणत असताना ट्रॅक्टर पातोंडा येथून रावेरकडे न आणता खिरवडच्या दिशेने पळवून नेण्यात आले. या ट्रॅक्टरला महसूल पथकाच्या वाहनाने कर्मचाऱ्यांनी अडवण्याचा प्रयत्न केला असता त्यांच्या वाहनाला कट मारण्यात आला. दुसरीकडे तहसील कार्यालयात जमा करण्यासाठी आणताना ट्रॅक्टरवर बसलेले शेलकर यांना धक्का देत ट्रॅक्टरवरून मनोज बोरसे याने ढकलून देत ट्रॅक्टर घेऊन पळून गेला.
याप्रकरणी रावेर येथील परिविक्षाधीन तहसीलदार मयूर कळसे यांनी फिर्याद दिल्यावरून रावेर पोलिसात मोहन बोरसे, मनोज बोरसे यांच्यासह ९ जणांविरुद्ध गुन्हा दाखल करण्यात आला असून पुढील तपास रावेर पोलिस स्टेशनचे पोलिस निरीक्षक कैलास नागरे यांचे मार्गदर्शनाखाली पोलीस उपनिरीक्षक सचिन नवले हे करीत आहेत.
