मुंबई (वृत्तसंस्था) अल्पवयीन मुलीच्या गालाला चुकीच्या पद्धतीने स्पर्श केल्याचा आरोप असणाऱ्या व्यक्तीला मुंबई हायकोर्टाने जामीन दिला आहे. पॉक्सो कायद्यांतर्गत लैंगिक हेतूशिवाय अल्पवयीन मुलीच्या गालाला स्पर्श करणं लैंगिक अत्याचार नाही असं यावेळी कोर्टाने सांगितलं. न्यायमूर्ती के शिंदे यांच्या खंडपीठासमोर ही सुनावणी पार पडली.
“माझ्या मते पॉक्सो कायद्यातील कलम ७ अंतर्गत कोणत्याही लैंगिक हेतूशिवाय गालाला हात लावणं लैंगिक अत्याचार नाही,” असं यावेळी न्यायमूर्ती के शिंदे यांनी सांगितलं. संबंधित ४६ वर्षीय व्यक्तीवर आठ वर्षाच्या मुलीच्या गालांना चुकीच्या पद्धतीने स्पर्श केल्याचा आरोप होता. मुलीच्या आईने ठाण्यात पोलीस ठाण्यात तक्रार दाखल केली होती. जुलै २०२० पासून या व्यक्तीला कोठडीत ठेवण्यात आलं होतं.
पॉक्सोमधील कलम ७ अंतर्गत कोणीही लैंगिक हेतूने अल्पवयीनाच्या मुलगा किंवा मुलीच्या गुप्तांगाला स्पर्श केलं किंवा अल्पवयीनाला आपल्या गुप्तांगाला स्पर्श करण्यास भाग पाडलं किंवा लैंगिक हेतून शारिरीक संपर्क होईल अशी कोणतीही गोष्ट केल्यास तो लैंगिक अत्याचाराचा गुन्हा आहे.
कोर्टाने सुनावणीदरम्यान, “हाती आलेल्या पुराव्यांनुसार प्राथमिकदृष्ट्या आरोपीने कोणत्याही लैंगिक हेतूशिवाय पीडित मुलीच्या गालाला स्पर्श केल्याचं दिसत आहे,” असं सांगितलं. आरोपीच्या वकिलांनी व्यावसायातील शत्रुत्वामुळे गुन्हा दाखल करण्यात आल्याच आरोप केला. तपास पूर्ण झाला असून चार्जशीट दाखल झाल्याचंही यावेळी त्यांनी सांगितलं. दरम्यान कोर्टाने जामीन देताना मांडण्यात आलेल्या मताचा दुसऱ्या प्रकरणांच्या खटल्यांवर होऊ नये असं स्पष्ट केलं आहे.
