जळगाव (प्रतिनिधी) शहरातील जलाराम नगरातील १४ वर्षीय विद्यार्थी गेल्या दि.१६ जानेवारीपासून बेपत्ता होता. याप्रकरणी तालुका पोलिसात गुन्हा दाखल करण्यात आला होता. पोलिसांनी केलेल्या चौकशीत धक्कादायक बाब उघड झाली असून मयत मुलाच्या आईचे एका तरुणासोबत अनैतिक संबंध होते. त्या संबंधात अडसर ठरत असल्याने आईनेच प्रियकराच्या मदतीने मुलाचा काटा दूर काढला. दरम्यान, महिला आणि तिच्या प्रियकराला पोलिसांनी बेड्या ठोकून कोठडीत रवाना केले आहे.
यासंदर्भात अधिक असे की, अनैतिक संबंधात अडसर ठरणाऱ्या मुलाला आईनेच मित्राच्या मदतीने जंगलात गळफास देवून खून केल्याचा धक्कादायक प्रकार समोर आला आहे. पुरूषोत्तम उर्फ प्रशांत विलास पाटील (वय-१४ रा. सावखेडा शिवार, जलाराम नगर जळगाव) असे मयत मुलाचे नाव आहे. तर त्यांची आई मंगलाबाई विलास पाटील (वय ३५) आणि प्रमोद जयदेव शिंपी (वय-३८ रा. विखरण ता. एरंडोल) असे अटक केलेल्या संशयित आरोपींची नावे आहे.
बालक रविवारपासून होता बेपत्ता
याबाबत फिर्यादीत नमूद केल्यानुसार विलास नामदेव पाटील हे चालक असून पत्नी मंगला पाटील आणि मुलगा प्रशांत पाटील यांच्यासह जलाराम नगरात वास्तव्याला आहेत. विलास पाटील हे खासगी वाहन चालवून आपल्या कुटुंबाचा उदरनिर्वाह करतात. दरम्यान, त्यांची पत्नी मंगला पाटील आणि प्रमोद शिंपी यांचे वर्षभरापासून सूत जमले होते. पुरुषोत्तम ऊर्फ प्रशांत पाटील आई-वडिलांसह वास्तव्यास असून, नववीचे शिक्षण घेत होता. ऑनलाइन वर्ग सुरू असून, रविवारी (ता. १६) सुटीचा दिवस असल्याने तो, घरातून बेपत्ता झाला. वडील विलास पाटलांसह नातेवाईक कुटुंबीयांनी शोध घेतल्यानंतरही तो, मिळून न आल्याने या प्रकरणी तालुका पोलिसांत अपहरणाचा गुन्हा दाखल करण्यात आला होता.
अखेर संशयिताने तोंड उघडले
दाखल गुन्ह्याच्या तपासात कुठलीच माहिती कशी समोर येत नाही, म्हणून पोलिस निरीक्षक रामकृष्ण कुंभार, उपनिरीक्षक नयन पाटील, सहाय्यक फौजदार वासुदेव मराठे, सतीश हाळणोर, भांडारकर यांच्यासह गुन्हेशोध पथकाने या मुलाच्या शोधात जंगजंग पछाडूनही माहिती हाती लागलीच नाही. गुप्त बातमीदाराने शंका उपस्थित केल्यावर अखेर तांत्रिक माहितीचा आधार घेतल्यावर प्रशांत बेपत्ता झाल्यापासून ते आज अखेर त्याच्या कुटुंबीयांशी जवळीक असलेल्या व्यक्तींवर संशय बळावला होता. त्यातूनच एकाला ताब्यात घेण्यात आले. सोमवारची रात्र आणि मंगळवारचा दिवस असा तालुका पोलिसांत पाहुणचार घेतल्यानंतर संशयिताने तोंड उघडले. पोलिसांचे पथक प्रजासत्ताक दिनाच्या पूर्वसंध्येला संशयिताला घेऊन मध्य प्रदेशाच्या दिशेने रवाना झाले. पोलीसांनी मयत प्रशांतच्या मोबाईलचे कॉल डिटेल तपासले असता प्रमोद शिंपी यांच्या मोबाईलवर वारंवार कॉल केल्याचे दिसून आले. त्यानंतर पोलीसांनी तांत्रिक मदतीने प्रमोद शिंपी आणि मयत प्रशांत पाटीलचे लोकेशन एक असल्याचे दिसून आले. त्यानुसार पोलीसांनी तपासाला सुरूवात केली.
कबुतरांच्या छंदापायी चिमुरडा जाळ्यात
तपासी पथकाच्या पाहुणचारात अटकेतील भामट्याने पुरुषोत्तम ऊर्फ प्रशांत पाटील याला त्याच्या आईच्या मित्राने, ‘तुला कबुतरांचा मोठा पिंजरा घेऊन देतो’ असे सांगत गोड बोलून मध्य प्रदेशात घेऊन गेला. निर्मनुष्य जंगलात नेऊन या बालकाची हत्या करून मृतदेहाची विल्हेवाट लावल्याची कबुली संशयिताने पोलिसांना दिली आहे. २६ जानेवारी रोजी दुपारी २ वाजता संशयित आरोपी प्रमोद जयदेवर शिंपी याची कसून चौकशी केली असता त्याने ही गुन्ह्याची कबुली दिली. यासाठी मयत प्रशांतची आई मंगलाबाई पाटील याचा सहभाग असल्याचे निष्पन्न झाले. पोलीसांनी दोघांना अटक केली. पोलीसांनी बर्‍हाणपुर येथील जंगलातील घटनास्थळी जावून मुलाच्या मृतदेहाचा पंचनामा केला.
१ फेब्रुवारीपर्यंत पोलीस कोठडी
दरम्यान, मुलाचा खून करणाऱ्या दोन्ही संशयित आरोपींना गुरूवार २७ जानेवारी रोजी जिल्हा न्यायालयात हजर केले असता दोघांना न्यायालयाने १ फेब्रुवारीपर्यंत पोलीस कोठडी दिली आहे. या गुन्ह्याच्या तपासाकामी पोलिस निरीक्षक रामकृष्ण कुंभार, उपनिरीक्षक नयन पाटील, सहाय्यक फौजदार वासुदेव मराठे, सतीश हाळणोर, भांडारकर यांच्यासह गुन्हेशोध पथकाने परिश्रम घेतले. या घटनेमुळे परिसरात खळबळ उडाली आहे.
