जळगाव (प्रतिनिधी) मुक्ताईनगरच्या सहा नगरसेवकांनी तीन दिवसांपूर्वीच शिवसेनेत प्रवेश केला होता. त्यानंतर आज पुन्हा जळगाव महापालिकेतील भाजपच्या तीन नगरसेवकांनी मुख्यमंत्री उध्दव ठाकरे यांच्या उपस्थितीत वर्षा बंगल्यावर शिवबंधन बांधल्यामुळे राजकीय क्षेत्रात खळबळ उडाली आहे.
यात नगरसेविका सौ. शोभाताई दिनकर बारी व शेख हसीना बी शेख शरीफ तर नगरसेवक सुरेश माणिक सोनवणे या भाजपच्या तीन सदस्यांचा समावेश आहे. मुख्यमंत्री उध्दव ठाकरे यांनी वर्षा बंगल्यावर शिवबंधन बांधून या तिन्ही सदस्यांचे शिवसेनेत स्वागत केले.
अलीकडेच पालकमंत्री ना. गुलाबराव पाटील आणि आमदार चंद्रकांत पाटील यांच्या प्रयत्नांनी मुक्ताईनगर नगरपंचायतीच्या सहा नगरसेवकांनी शिवसेनेत प्रवेश केला होता. तर चार नगरसेवक शिवसेनेच्या वाटेवर असल्याचे सांगण्यात आले होते. यानंतर आज दुपारी काही नगरसेवक हे शिवसेनेच्या संपर्कात असल्याची माहिती समोर आली होती. तर सायंकाळी उपमहापौर कुलभूषण पाटील यांनी तीन नगरसेवक शिवसेनेत प्रवेश घेत असल्याची माहिती दिली.
