जळगाव (प्रतिनिधी) शेंगदाणा चिक्की विकून शिक्षण करणार्या शुभम सोनार या तरुणाला डॉ. नि. तु. पाटील यांनी सायकल भेट देत आपल्या मुलाच्या वाढदिवस अनोख्या पद्धत्तीने साजरा करत समाजासमोर आदर्श घालून दिला आहे. याआधी देखील डॉ. पाटील यांनी सोशल मीडियात टाकल्यानंतर शुभमला अनेकांनी मदत केली होती.
शुभमने आता जळगावच्या पाठोपाठ त्याने भुसावळातही चिकी विक्री सुरू केली असून त्याला प्रतिसाद लाभत असल्याचे दिसून आले आहे. प्रसिद्ध नेत्ररोग तज्ज्ञ तथा भाजपच्या वैद्यकीय आघाडीचे उत्तर महाराष्ट्र सहसंयोजक डॉ. नि. तु. पाटील काही दिवसांपूर्वी जळगावला आले होते. यावेळी त्यांना शुभम सोनार हा मुलगा चिक्की विक्री करतांना दिसून आला. त्यांनी त्याच्याकडून चिकी घेऊन विचारपूस केली असता, त्याने आपण हा व्यवसाय करून घरच्यांना हातभार लावतांनाच शिक्षण घेत असल्याचे सांगितले. त्याचे वडील व्याधीग्रस्त असल्याने अंथरूळाला खिळून असून आई किरकोळ वस्तू विकून उदरनिर्वाह भागविते. दरम्यान, आज डॉ. नि. तु. पाटील यांचा मुलगा चि. वेदांत यांचा वाढदिवसाच्या दिवशी इतर उपक्रम न करता शुभमला कमी वेळामध्ये जास्त ठिकाणी पोहोचता यावे आणि वाचवलेल्या वेळेत आपला अभ्यास करता यावा या दूरदृष्टीने ऊँ सिद्धगुरु नित्यानंद प्रतिष्ठानतर्फे शुभमला सायकल आणि श्री रामरक्षा भेट दिली. दरम्यान, डॉ. नि. तु. पाटील यांच्या या सामाजिक उपक्रमाचे सर्व स्तरातून अभिनंदन होत आहे.
