चोपडा (प्रतिनिधी) येथील प्रदीप पावरा यांचा ४ एप्रिलला रात्री जळगाव शासकीय वैद्यकीय महाविद्यालयात कोरोना काळात डॉक्टरांच्या अक्षम्य भेदभावपूर्ण व्यवहारामुळे मृत्यू झाला. हा मेडिकल कॉलेजच्या निष्काळजीपणाचा बळी आहे, असा आरोप त्यांची पत्नी व मूले व लोकसंघर्ष मोर्चा संघटनेने केला आहे. तसेच याप्रकरणी कारवाईचे आदेश द्यावेत, अशी मागणी महाराष्ट्रातील “जन आंदोलनसंघर्ष समिती”ने मुख्यमंत्र्यांकडे निवेदनाद्वारे केली आहे.
मुख्यमंत्र्यांना दिलेल्या निवेदनात म्हंटले आहे की, प्रदीप पावरा यांना दि. २९ मार्च २०२१ रोजी लासुर (ता. चोपडा, जि. जळगाव) प्राथमिक आरोग्य केंद्रात कोरोना चाचणी केली असता ते पॉसिटीव्ह निघाले. तरी देखील त्यांना ऍम्ब्युलन्स दिले नाही. तो आपला मुलगा व बायको बरोबर मोटार सायकलवर बसून २२ किमी प्रवास करत RH चोपडाला पोहचला तेथून त्याला शासकीय वैद्यकीय महाविद्यायात रेफर केले. पण त्यांना बेड नाही सांगत रुग्णालयात घेतले नाही. ज्यावेळी बेड उपलब्ध होते. त्यावेळी ऍम्ब्युलन्समध्ये ऑक्सिजन संपत आला होता. म्हणून मग नाईलाजाने त्यांना खाजगी दवाखान्यात भरती केले. तेथे होणारे मेडिकल बिल शक्य नव्हते म्हणून ३० मार्च रोजी जिल्हाधिकारी मार्फत त्याला GMC त दाखल केले. त्यानंतर २ एप्रिल रोजी सायंकाळी ७ वाजता आम्हाला डॉक्टरांनी सांगितले की, याला १० दिवस तरी ICU मधून हलवता येणार नाही, तेव्हा प्रदीपला कुटुंबीय भेटले असता तो म्हणाला इथले एक डॉक्टर आणि वॉर्ड बॉय हे त्याचा खूप राग करतात “आई शपथ तुला उपचार करणार नाहीत म्हणतात” कुटुंबीयांनी ती तक्रार लगेच डीन यांच्याकडे तोंडी केली होती.
ICU मधे एकूण ४६ पेशंट असताना रात्री १२ वाजता अचानक प्रदिप पावरा याला ICU मधून PNC वॉर्डमध्ये हलवण्यात आले. क्रिटिकल पेशंट असताना त्यांना का हलवले गेले? तेथे रात्री ते पलंगावरून खाली पडले व बराच वेळ ते त्याच अवस्थेत होते. त्यावेळी त्यांना ऑक्सीजन मिळाला नाही व त्यांची तब्येत अधिक क्रिटिकल झाली व ते अचेतन अवस्थेत गेले. ते नंतर उठलेच नाही आणि त्याचा मृत्यू झाला. सर्व वॉर्डमध्ये सीसीटीव्ही आहे. अगदी त्यांनी रेकॉर्ड रूम व एका अडगळीच्या रूमला पण कॅमेरे लावले आहेत. मात्र ICU व PNC वॉर्डमध्ये सीसीटीव्ही कॅमेरे लावलेले नाहीत.
हा मेडिकल कॉलेजच्या निष्काळजीपणाचा बळी आहे, असा आरोप त्यांची पत्नी व मूले व लोक संघर्ष मोर्चा संघटनेने केला आहे. याबाबत स्वतंत्रपणे राज्यपाल व मुख्यमंत्री यांना पत्र ही पाठवण्यात आले आहे. पहाटे ४ वाजता त्यांचा मृत्यूझाल्यानंतर लोक संघर्ष मोर्च्याने मुलाच्या नावाने जळगाव शहर पोलीस स्टेशनला तक्रार अर्ज दाखल केला आहे.
प्रदीप पावरा हा आदिवासी असून त्याच्याबाबत जी भेदभावपूर्ण वागणूक व उपचाराबाबत जी हेळसांड केली गेली ती अत्यंत आक्षेपार्ह व निषेधार्ह आहे. या अन्याय विरुद्ध त्याच्या कुटुंबियांना न्याय हवा आहे. याबाबत आम्ही खालील मागण्या आपणाकडे करत आहोत.
१) एक निपक्षपाती समिती नेमून याची चौकशी केली जावी व त्यात जे दोषी आढळतील त्यांच्याविरुद्ध कायदेशीर कारवाई करावी.
२) हॉस्पिटल मधील ड्युटीवर असलेले डॉक्टर व वार्डबॉय यांना सस्पेंड करावे.
३) अनुसूचित जाती व जमाती अत्याचार प्रतिबंधक कायद्याअंतर्गत कारवाई करावी.
४) प्रदिप पावराच्या कुटुंबीयांना आर्थिक नुकसान भरपाई मिळावी.
यात स्वत: लक्ष घालून कारवाईचे आदेश द्यावेत, अशी मागणी महाराष्ट्रातील “जन आंदोलन संघर्ष समिती”ने निवेदनाद्वारे केली आहे.
यावेळी निवेदन देताना बाबा आढाव, साथी गणेश देवी, न्या. बी. जे. कोळसे पाटील, आ. पिल पाटील, कॉ. अशोक ढवळे, साथी, मेधा पाटकर, राजू शेट्टी, साथी प्रतिभा शिंदे, कॉ. नामदेव गायकवाड, कॉ. सुकुमार दामले, विश्वास उडगी, संजीव साने, उल्का महाजन, अरविंद जक्का, विलास भोंगडे, किशोर ढमाले, लता भिसे, इब्राहिम खान, मानव कांबळे, सुभाष वारे, प्रकाश रेड्डी, राजू देसले, नितीन मते व सर्व महाराष्ट्रातील ८० संघटनांचे नेते उपस्थित होते.
